ارىستاعى توتەنشە جاعدايعا بايلانىستى قالا اۋماعىندا دەزينفەكسيا جۇمىستارىن جۇرگىزۋ ماقساتىندا جامبىل جانە قىزىلوردا وبلىستارىنان ارنايى ماماندار توبى كەلدى دەپ حابارلايدى Qamshy.kz اقپارات اگەنتتىگى تۇركىستان وبلىستىق وڭىرلىك كوممۋنيكاسيالار قىزمەتىنە سىلتەمە جاساپ.
"جامبىل وبلىسىنان تاۋارلار مەن كورسەتىلەتىن قىزمەتتەر ساپاسىن باقىلاۋ دەپارتامەنتىنەن جانە وزگە دە زالالسىزداندىرۋ ورتالىقتارىنان جالپى سانى 30-عا جۋىق مامان كەلدى. ال قىزىلوردا وبلىسىنان ۇلتتىق ساراپتاما ورتالىعىنىڭ وسى وڭىردەگى فيليالىنان 17 مامان كەلسە، وزگە دە وسى سالاعا جاۋاپتى ماماندار زالالسىزداندىرۋ جۇمىستارىن باستاپ كەتتى. بۇل بريگادالاردىڭ ءبارى تەحنيكامەن، قاجەتتى قۇرال-جابدىقپەن، قامتىلعان"، - دەپ حابارلادى وڭىرلىك كوممۋنيكاسيالار قىزمەتىندەگىلەر.
ەسكە سالايىق، 24 ماۋسىمدا ساعات 9.20-دا ارىس ماڭىنداعى اسكەري ءبولىم تەرريتورياسىندا ورنالاسقان قارۋ-جاراق قويماسىندا وق-دارىلەر جارىلعان بولاتىن. كەيىنىرەك قازاقستان پرەزيدەنتى قاسىم-جومارت توقايەۆ ارىسقا بارىپ، جارىلىستىڭ زارداپتارىن جويۋ جونىندە شۇعىل شارالار قابىلداۋدى تاپسىرعان ەدى.
پىكىر قالدىرۋ