ارىس قالاسىنىڭ تۇرعىندارىن ەرتەڭ، ياعني، 28 ماۋسىمدا، تاڭعى 8.00-دە قالاعا كىرگىزۋ باستالادى. بۇل تۋرالى بۇگىن تۇركىستان وبلىسىندا قۇرىلعان شتابتاعى باسپا ءسوز ءماسليحاتىندا وبلىس اكىمى ءومىرزاق شوكەيەۆ مالىمدەدى دەپ حابارلايدى Qamshy.kz اقپارات اگەنتتىگى. 

ءوڭىر باسشىسى ارىس قالاسى مەن اسكەري قويمادا وق-دارىلەردى تازالاۋ جانە قالانى دەزينفەكسيالاۋ شارالارى اياقتالعانىن، ءقاۋىپ بۇلتى تولىق سەيىلگەنىن مالىمدەدى.

"ارىس قالاسىنىڭ تۇرعىندارىن ەرتەڭ 28 ماۋسىم كۇنى ساعات تاڭعى 8.00-دەن باستاپ  ۇيىمداسقان تۇردە اۆتوبۋستىق كولوننالارىمەن كىرگىزە باستايمىز. ال جەكە تۇلعالاردىڭ كولىكتەرىن ساعات 12.00-دەن باستاپ كىرگىزەمىز. تۇرعىنداردى كىرگىزۋ ءۇشىن ارىس قالاسى 17 سەكتورعا ءبولىندى. وسى سەكتورلارعا وبلىسىمىزدىڭ  اۋدان، قالا اكىمدىكتەرىنەن 640 جاۋاپتى (1 اۋدان - 40 ادام) ازامات بەكىتىلدى. ءاربىر 10 ۇيگە 1 قىزمەتكەردەن جاۋاپتى. تۇرعىنداردى جايعاستىرۋ كەزىندە وسى ازاماتتارعا ارىستىق كوشە، اۋلالاردىڭ بەلسەندىلەرى كومەك بەرەتىن بولادى. قازىرگى تاڭدا ارىس قالاسىنداعى توتەنشە جاعداي تولىق باقىلاۋعا الىندى. ءورت وشاقتارى ءسوندىرىلدى. الاڭداۋعا ەش نەگىز جوق. ارىستىقتارعا كومەك رەتىندە «تۇركىستان» كورپوراتيۆتىك الەۋمەتتىك دامۋ قورىندا ارنايى ەسەپ-شوت اشىلىپ، بۇگىنگى تاڭدا 721 ملن تەڭگە جيناقتالدى. تۇركىستان وبلىسى اكىمدىگى تاراپىنان ارىس قالاسىنىڭ تۇرعىندارىنا ازىق-تۇلىكپەن كومەك كورسەتۋ جونىندە شتاب قۇرىلعان. قايىرىمدىلىق اكسياسى اياسىندا حالىققا قاجەتتى جالپى كولەمى 150 توننا زات جينالدى. قاراعاندى، جامبىل، قىزىلوردا، اقتوبە، باتىس قازاقستان، الماتى وبلىستارى مەن الماتى جانە شىمكەنت قالالارىنان جەتكىزىلدى. ەۆاكۋاسيالىق ورتالىقتاردا ەلگە كومەك كورسەتىلدى. مەملەكەت تاراپىنان دا قارجىلاي قولداۋ بولادى. مۇنىڭ ءبارى ەل يگىلىگى ءۇشىن جۇمسالادى. قۇرمەتتى، ارىستىقتار! ءبىزدىڭ جۇرەگىمىز دە، تىلەگىمىز دە ءبىر. ءبىز ەلمەن بىرگە ارىس قالاسىن 1 اي ىشىندە تولىق قالپىنا كەلتىرىپ قانا قويماي، ونى ودان دا جاقسى جاعدايعا جەتكىزەمىز. ول ءۇشىن شىدام، ۇيىمشىلدىق جانە پاتريوتيزم كەرەك"، – دەدى ءو.شوكەيەۆ. 

تۇرعىندار ۇيىنە ورالعاندا بەكىتىلگەن قىزمەتكەرلەر فوتو-ۆيدەوفيكساسيا جاساپ، شىعىنداردى ەسەپتەۋگە كومەك بەرەدى. جايعاسۋ بارىسىندا وبلىستىق پوليسيا قىزمەتكەرلەرى مەن دارىگەرلەر، توتەنشە جاعداي دەپارتامەنتى مەن قۇزىرلى مەكەمەلەر ۇزدىكسىز قىزمەت كورسەتەدى. 

سونىمەن قاتار ارىستىقتارعا قۇرىلىس-جوندەۋ جۇمىستارىنا كومەك بەرۋ ءۇشىن ەلىمىزدىڭ بارلىق وڭىرىنەن 160  ارنايى بريگادا كەلەدى. ءاربىر وبلىسقا ارىس قالاسىنداعى بولىنگەن سەكتورلار بويىنشا جۇمىستار بەرىلەدى. ال ق ر قورعانىس ءمينيسترىنىڭ ورىنباسارى باقىت قۇرمانبايەۆ ساپەر-ماماندار ارىس قالاسى مەن اسكەري قويمادا وق-دارىلەردەن تازالاۋ جۇمىستارىن اتقارعانىن ايتتى. ارىستا 400-دەن استام اسكەري ماماندار قالا اۋماعى مەن اسكەري قويمانى، كوشەلەردى، تەمىر جولدى تەكسەرىپ شىقتى. قالا تازالاندى. 

ءۇيىڭىز بەن اۋلاڭىزعا كىرگەندە كۇدىكتى زاتتار بايقاساڭىز 112 نەمەسە 102 نومىرىنە قوڭىراۋ شالۋ قاجەت. ۇرلىق بولدى دەگەن كۇدىك بولسا، ەشبىر زاتقا تيىسپەي، 102 نومىرىنە قوڭىراۋ شالۋ كەرەك. ۇيدە قالعان ازىق-تۇلىكتى جويىپ، سۋدى دا 10 مينۋت اعىزعان ابزال. ەرتەڭ تۇرعىندارعا ارنايى جادىنامالار ازىرلەنىپ، تاراتىلادى. 

توتەنشە جاعدايلار جونىندەگى كوميتەت ءتوراعاسى ۆلاديمير بەككەر قالاداعى الەۋمەتتىك نىساندار تەكسەرۋدەن وتكەنىن مالىمدەسە، ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ ۇكىمەت تاراپىنان ارىستىقتارعا جاعداي جاسالاتىنىن، قالا جەدەل قالپىنا كەلتىرىلەتىنىن جەتكىزدى.