قىرعىزستاننىڭ بۇرىنعى پرەزيدەنتى المازبەك اتامبايەۆ ءوزىنىڭ ەكس-پرەزيدەنت مارتەبەسىن الىپ تاستاعان پارلامەنت شەشىمىنە پىكىر ءبىلدىردى دەپ حابارلايدى Qamshy.kz اقپارات اگەنتتىگى. 

كەشە قىرعىزستاننىڭ جوعارعى كەڭەسى اتامبايەۆتى ەكس-پرەزيدەنت مارتەبەسىنەن ايىردى. اتامبايەۆتىڭ جاقتاستارى ونىڭ قوي-تاش اۋىلىنداعى ۇيىنە جينالدى. ساياساتكەر جۋرناليستەرمەن اڭگىمەلەسىپ، جاعدايدى تۇسىندىرگەن.

ونىڭ سوزىنشە، ەلدە ءقازىر بۇرىنعى پرەزيدەنتتى قاماۋعا الۋعا دايىندىق ءجۇرىپ جاتقانى تۋرالى اقپارات بار.

–مەنى ۇستاۋعا دايىندىق ءجۇرىپ جاتقانىن ءبارىمىز بىلەمىز. كۇشتىك قۇرىلىمدار اراسىندا دا مەنىڭ جاقتاستارىم كوپ. ساۋاتسىز ادامداردىڭ ساۋاتسىز بۇيرىقتارىنا شاعىمدانىپ ۇقك، ىىم-دە جۇرگەن تالاي وفيسەر جىلاپ كەلگەن ماعان. مەن بارىنە دايىنمىن. قارسىلىق كورسەتەمىن.ەگەر ۇستاۋعا كەلەتىن بولسا، سىيعا العان تاپانشام بار ەكەنىن ۇمىتپاسىن، مەن مۇنى اشىق ەسكەرتىپ جاتىرمىن. وڭايشىلىقپەن بەرىلە سالمايتىنىمىزدى ءبىلسىن. الايدا ماعان جىبەرەتىن جىگىتتەردى ايايمىن. قىرعىزدا "جاتىپ ولگەنشە، اتىپ ءول" دەگەن ءسوز بار. مەنىڭ جانىمدا ەشكىم بولمايدى"، — دەدى اتامبايەۆ.

بۇرىنعى پرەزيدەنت ەلىنىڭ ءبىر جىل بۇرىن "زاڭ اياسىنان شىعىپ كەتكەنىن" مالىمدەدى. اتامبايەۆ "بۇل بيلىك تەك ءوزىنىڭ ادامدارىن عانا قورعاۋدى بىلەدى، ۇنامايتىندارىن تۇرمەگە وتىرعىزىپ جاتىر" دەدى. ول ەلىن تاستاپ ەشقايدا كەتپەيتىنىن دە جەتكىزدى. "بۇل – مەنىڭ وتانىم. قاشاتىندار – باسقا ادامدار. ەگەر كىمدە-كىم مەنى قۇرتقىسى كەلسە، ەرتە مە، كەش پە، وزدەرى قاشىپ كەتەدى"، - دەپ جاۋاپ بەردى تىلشىلەردىڭ سۇراعىنا.