ماڭعىستاۋ وبلىسىنىڭ جاستار رەسۋرستىق ورتالىعىنىڭ «ارىسقا كومەك» اكسياسى اياسىندا جاستارعا ارنالعان «ارمان» كوۆوركينگ ورتالىعىندا اشىلعان تۇركىستان وبلىسى، ارىس قالاسىنداعى توتەنشە جاعداي سالدارىنان زارداپ شەككەندەرگە ارنالعان گۋمانيتارلىق كومەك جيناۋ پۋنكتىندە 4 توننا گۋمانيتارلىق جۇك جينالدى. ونىڭ ىشىنە  ازىق-تۇلىكتەر، كيىم-كەشەكتەر، دارى-دارمەكتەر، جەكە گيگيەنا قۇرالدارى جانە ءبىرىنشى كەزەكتە قاجەتتى زاتتار كىرەدى.

زارداپ شەككەندەرگە كومەك كورسەتۋگە اقتاۋ قالاسىنىڭ «ماعاش»، «ماسات» جانە «اسار-س» بازارىنىڭ ساۋداگەرلەرى، ماڭعىستاۋ وبلىستىق دارىگەرلەر مەن پروۆيزورلار قاۋىمداستىعى، جەكە كاسىپكەرلەر، سونىمەن قاتار، ۆولونتەرلار مەن قالا تۇرعىندارى اتسالىستى.

ماڭعىستاۋ وبلىسىنىڭ جاستار رەسۋرستىق ورتالىعىنىڭ ديرەكتورى ابىلاي فازىلبەك: «25 ماۋسىمنان باستاپ وبلىستاعى بارلىق اۋداندىق جانە قالالىق جاستار رەسۋرستىق ورتالىقتارىندا كومەك پۋنكتى ءوز جۇمىسىن باستادى. اقتاۋ قالاسى بويىنشا اتالعان اكسياعا 30 ۆولونتەر جۇمىلدىرىپ، ارنايى اقپاراتتىق ءىس-شارالار ۇيىمداستىرىلىپ، 1،5 كۇندە اقتاۋ قالاسىنىڭ جومارت ازاماتتارىنىڭ قولداۋىمەن 4 تونناعا جۋىق گۋمانيتارلىق جۇك جينالدى. سونىمەن قاتار، قالا تۇرعىندارى اكەلگەن تەز بۇزىلاتىن ازىق-تۇلىكتەردى ماڭعىستاۋ وبلىستىق مەشىتى جانىنداعى مەدرەسەگە تابىستادىق. جاستارعا ارنالعان "ارمان" كوۆوركينگ ورتالىعىندا ورنالاسقان كومەك پۋنكتى اقشالاي كومەك ءتۇرىن قابىلدامادى، اقشالاي كومەك كورسەتەمىن دەۋشىلەر «تۇركىستان» كورپوراتيۆتىك الەۋمەتتىك دامۋ قورىنا اۋدارۋ كەرەكتىگى ءتۇسىندىرىلدى. وسى رەتتە،يگى ىسكە اتسالىسقان ازاماتتارعا، قالا تۇرعىندارىنا العىس بىلدىرەمىز.»

#ارىس2019

#ماڭعىستاۋارىسپەنبىرگە