ارىستاعى اعايىننىڭ ۇرەيىن تۋعىزعان اپاتتان كەيىن نەشە ءتۇرلى جاعدايلار ايتىلىپ جاتىر. ال ارىستىق پوليسەيدىڭ ءۇيىن جارىلىستان قورعاپ قالعان جىلقىنىڭ تاريحى تۋرالى Qamshy.kz اقپارات اگەنتتىگى ايتادى.
ارىس قالاسىندا تۇراتىن پوليسيا قىزمەتكەرى باعلان جارىلقاسىموۆ ءۇيىنىڭ جانىندا قورادا تۇرعان جىلقىسىنىڭ قۇيرىعىنا بايلانىپ قالعان سنارياد تۋرالى ايتىپ بەردى. تۋرا تۇسسە، ءۇيدىڭ كۇلىن كوككە ۇشىراتىن سناريادتان ونى جىلقىسى ساقتاپ قالعان كورىنەدى.
"نە دەرىمدى دە بىلمەيمىن. ءبىراق الگى سنارياد مەنىڭ اتىمنىڭ قۇيرىعىنا ورالىپ قالىپتى. مۇمكىن، مەنىڭ اتىم – مەنىڭ ءۇيىمدى ساقتاپ قالعان پەرىشتەم شىعار"، - دەپ اعىنان جارىلدى پوليسيا قىزمەتكەرى.
پوليسيا قىزمەتكەرىنىڭ ايتۋىنشا، ۇيىنە قايتىپ ورالعان كەزدە قورانىڭ ىشىندەگى جىلقىنىڭ قۇيرىعىنا ورالىپ تۇرعان سناريادتى كورگەن. ول سناريادتى كورە سالا ساپەرلارعا حابار بەرگەن.
پوليسيا قىزمەتكەرى جارىلىس بولعان كۇندى ەسكە الىپ، وتباسىن باۋىرىنا تابىستاعان كۇيى قايتا قىزمەتكە ورالعانى تۋرالى ايتىپ بەردى.
"ءبىز جول بويىمەن قاشىپ بارا جاتتىق. بىزبەن بىرگە كورشىلەر دە قاشتى. ءبارىنىڭ كوزىندە قورقىنىش بولدى. ەشكىمنىڭ ولگىسى جوق. وتباسىمدى قالا سىرتىنا دەيىن شىعاردىم دا، ارىپتەستەرىممەن بىرگە قىزمەتكە ورالدىم. تۇرعىنداردى ەۆاكۋاسيالاۋعا كۇش سالدىق"، - دەيدى باعلان.
پىكىر قالدىرۋ