ق ر ءبعم-نىڭ قىزمەتكەرلەرى تولعاعى كەلگەن جۇكتى ايەلگە كومەكتەستى. بۇل وقيعا جاڭاعى ايەل باسقا تۇرعىندارمەن بىرگە ارىس قالاسىن تاستاپ بارا جاتقاندا بولعان. تولعاتىپ جاتقان ايەلدى جول ۇستىندە كەزدەستىرگەن قىزمەتكەرلەر ونى بالا تۋۋعا جاعدايى بار جەرگە جەتكىزدى. ناتيجەسىندە ءبارى دە ساتىمەن اياقتالىپ، ءسابي (قىز بالا) دۇنيەگە كەلدى. جۇكتى ايەلگە كومەك كورسەتكەندەردىڭ ىشىندە ءبىزدىڭ جەرلەسىمىز، اتىراۋ مۇناي جانە گاز ۋنيۆەرسيتەتىنىڭ دوسەنتى بالبوپە وتەنوۆا دا بولدى.
- ارىس قالاسىنداعى № 1 مەكتەپتىڭ بازاسىندا ۇلتتىق ءبىرىڭعاي تەست تاپسىرۋ ورتالىعى بار. بارلىعى وندا ەكى لەك وتكەن – 21 جانە 23 ماۋسىمدا، ءاربىر لەكتەن سوڭ اپەللياسيا بولادى. 24 ماۋسىم كۇنى 12 ادامنان تۇراتىن كوميسسيا اپەللياسياعا دايىندالىپ جاتقان. تاڭەرتەڭنەن جارىلىستار بولىپ، ادامداردى شۇعىل تۇردە قالادان شىعارا باستادى-دەپ اڭگىمەلەيدى ب.وتەنوۆا.
جارىلىس بولعاندا، وقىتۋشىلار مەكتەپتە جۇرگەن بولاتىن. ءبىرازدان سوڭ تۇرعىندار اپىل-عۇپىل قالادان كەتە باستادى.​
- ءبىز قالامەن تانىس ەمەسپىز، قايدا باراتىنىمىزدى دا بىلمەيمىز. شىعا بەرىستە تۇرعان ماشينالار بالالار مەن ەرەسەكتەردى الىپ كەتىپ جاتتى. جاياۋ ءجۇرىپ كەلە جاتتىق، ايتەۋىر ءبىر جاس جىگىت توقتاپ، تاياۋداعى اۋىلعا جەتكىزىپ تاستادى. سول جەردە جۇكتى جاس ايەلدى كوردىك – اكۋشەرمەن بىرگە كولىك كۇتىپ وتىر ەكەن. 41ء-شى اۋىلعا دەيىن بىرگە جەتىپ، العاشقى كەزدەسكەن، بەيتانىس ادامداردىڭ ۇيىنە توقتادىق. وسى وتباسىنا العىسىمدى بىلدىرگىم كەلەدى. ءۇي يەسى ايەل بولمە ءبولىپ، تازا توسەك، جايالىق بەردى، سۋمەن قامتاماسىز ەتتى. ءبىز دە بارىنشا كومەكتەستىك. جاس انا قىز بالا تۋدى. ءسابي ءىرى ەكەن، ءبىراق تاجىريبەلى اكۋشەردىڭ ارقاسىندا ءبارى دە ويداعداي بولدى. ءۇي يەلەرى بار جاعدايدى جاساپ، جەدەل جاردەم كەلگەنشە بارىنشا كومەكتەستى،-دەدى بالبوپە وتەنوۆا.​
امان –ەسەن بوسانعاسىن كەنجە اتتى جاس انانىڭ (بۇل – ونىڭ ەكىنشى بالاسى) تۋعاندارىمەن، جولداسىمەن، ەنەسىمەن حابارلاستىق.
- كەنجەمەن سويلەسكەنىمىزدە، ەگەر ۇل تۋسا، قيىن كەزەڭدە كومەكتەسكەن جۇرگىزۋشىنىڭ ەسىمىن بەرەمىز دەگەن. قىز تۋعاسىن، جاڭاعى جۇرگىزۋشىنىڭ اناسىنىڭ قۇرمەتىنە كاميلا دەپ اتادى. مەن ءسابيدىڭ كىندىگىن كەستىم. ءوزىمنىڭ ەكى قىزىم بار، ەندى بۇل بالا دا مەن ءۇشىن تۋعانىمداي بولماق. بايلانىستا بولىپ، ونىڭ تاعدىرىنىڭ قالاي بولارىن قاداعالاپ وتىرامىن. جاس انامەن بىرنەشە رەت تىلدەستىم، ءبارى دە جاقسى،- دەپ اتاپ ءوتتى ب.وتەنوۆا.​ ​
ول ءوزىن ەرلىك جاسادىم دەپ ەسەپتەمەيدى. دەسەك تە، وسىنداي سىن ساتتە ابدىراماي، باسقاعا كومەكتەسۋ اركىمنىڭ قولىنان كەلە بەرمەيتىنى حاق.
ەسكە سالا كەتەيىك، بۇدان بۇرىنىراق ءبىلىم جانە عىلىم ءمينيسترى اسحات ايماعامبەتوۆ بالبوپە وتەنوۆانى جانە ونىڭ ارىپتەستەرى جانات نۇرجۇمانوۆا مەن شايزى دوسكەيەۆانى قابىلداپ، باتىرلىق تانىتىپ، كومەك كورسەتكەندەرى ءۇشىن مينيسترلىكتىڭ العىسىمەن ماراپاتتاعان بولاتىن.​ ​ ​ ​ ​