اتىراۋ وبلىسىنىڭ اكىمى نۇرلان نوعايەۆ ءىرى مۇناي كومپانيالارى مەن ولاردىڭ مەردىگەرلەرىمەن جينالىس وتكىزدى دەپ حابارلايدى Qamshy.kz اقپارات اگەنتتىگى اتىراۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
اتىراۋ وبلىسىنىڭ اكىمى تەڭىز ۆاحتالىق قالاشىعىنداعى وقيعا ەڭبەك جاعدايىنىڭ بارلىعىنا بىردەي بولماعانىنىڭ سالدارىنان تۋىنداعانىن، سوندىقتان تشو مەن مەردىگەر مەكەمەلەر جاعدايدى تۇبەگەيلى وزگەرتۋگە كۇش سالۋلارى كەرەك ەكەنىن اتاپ ءوتتى.
"ەڭبەكاقى ايىرماشىلىعى تۋرالى شاعىم كوپ. جالاقى، جۇمىسشىلاردى ۇستەمە جۇمىستارعا تارتقانى ءۇشىن تولەنەتىن اقىلاردىڭ ۋاقىتتارى كەشىكتىرىلەدى. مەرەكە، دەمالىس كۇندەرى ىستەگەن جۇمىستار ءۇشىن پايدالانىلماعان كۇندەرگە وتەماقى تولەۋ ۋاقىتى بۇزىلادى. جۇمىس كۇنى كەستەسىن وزدەرى بەلگىلەيتىن دەرەكتەر بار. تەڭىز جوباسىندا مەردىگەر مەكەمەلەردىڭ ءبىرىنىڭ باسشىسى كۇن سايىنعى جۇمىس كۇنىن ءوز بەتىمەن 4 ساعاتقا كوبەيتكەن، ۇجىمنىڭ نارازىلىعى مەن ەڭبەك ينسپەكسياسىنا شاعىمدانۋىنان كەيىن جاعداي قالىپقا كەلدى. كوپشىلىگى جۇمىس بەرۋشىنىڭ زاڭسىز ارەكەتىن، ەڭبەك كودەكسىنىڭ تالابىنا سايكەسسىزدىكتى اشىپ ايتۋعا قورقادى. جۇمىس بەرۋشى قاندايدا بولماسىن سەبەپ تاۋىپ، جۇمىستان شىعارىپ جىبەرەتىنىن ايتىپ قورقىتادى. مۇنداي دەرەكتەر بار"،- دەدى نۇرلان نوعايەۆ.
كۇزەت فيرماسىنىڭ وكىلدەرى نىسانداردا قاۋىپسىزدىك پەن ءتارتىپتى ساقتاۋ بويىنشا تىكەلەي قىزمەتتىك مىندەتتەمەلەرىن ورىنداۋدىڭ ورنىنا جۇمىسشىلاردى قورقىتۋمەن اينالىسقان دەرەكتەر بار. شاعىم ايتقان جۇمىسشىدان قۇتىلۋدىڭ ءتۇرلى قۇيتىرقى ارەكەتتەرىن جاساعان فاكتىلەر دە بار. بۇل ارينە ادامدى اشىندىراتىن، ءتىپتى داۋ-جانجالعا اكەلەتىن جاعداي. سىزدەردىڭ مىندەتتەرىڭىز وسىنداي جاعدايلاردىڭ الدىن الۋ.
وبلىس اكىمى قازىرگى ەڭبەك جاعدايى مەردىگەر مەكەمەلەردەگى جۇمىسشىلاردىڭ كوپشىلىگىن قاناعاتتاندىرمايتىنىن اتاپ ءوتتى.
"شاعىم وتە كوپ، قۇرمەتتى جۇمىس بەرۋشىلەر، بۇرىن بۇل جاعداي قالىپتى بولىپ كەلسە، ەندى وزگەرتەتىن ۋاقىت جەتتى. مەملەكەت باسشىسىنىڭ بىردەي جۇمىس ىستەيتىن مامانداردىڭ ازاماتتىعىنا قاراماي ءبىر مولشەردە لايىقتى ەڭبەكاقى تولەۋ جونىندە تاپسىرماسى بار. ءيا، بەلگىلى ءبىر قىزمەتتىك يەرارحياعا كەلىسەمىن، بارلىعىن تەڭەستىرۋگە بولمايدى، ءبىراق ادىلدىك بولۋى ءتيىس. ءبىر ۇجىمدا بىردەي جۇمىس ىستەگەن ەكى ادامنىڭ ءبىرى 300 دوللار، ەكىنشىسى 3000 دوللار الماۋى كەرەك، ادامدار كورىپ وتىر. كوپشىلىگى مۇنى ىستەگەن جۇمىستارى مەن كورسەتكەن قىزمەتتەرىنە ادال اقى الماۋلارىمەن بايلانىستىرادى. تاپسىرىس بەرۋشىلەر، تشو، نسوس نەمەسە باسقا ءىرى كومپانيالار بولسىن ءوز تاراپتارىنان ەڭبەكاقىنى ءادىل تولەپ وتىرعاندارىن ايتادى،ءبىراق سوڭىندا ءبارىبىر بەلگىلى بولىپ قالادى. جۇمىسشىنىڭ قولىنا ەڭ سوڭىندا شامالى تيىن-تەبەن تۇسەدى، سوسىن ول وزىمەن بىردەي جۇمىس ىستەگەن شەت ەل ازاماتىنىڭ ەڭبەكاقىسىن كورىپ، مەن نەگە زارداپ شەگۋىم كەرەك دەگەن ساۋال قويادى"،- دەدى اكىم.
نۇرلان نوعايەۆ جەرگىلىكتى اتقارۋشى ورگاندار بارلىق ەڭبەكاقىنى كوتەرۋگە مىندەتتەمەيتىنىن، كومپانيالاردىڭ وندىرىستىك مىندەتتەمەلەرىن شەشپەيتىنىن اتاپ ءوتتى.
"مەن سىزدەردىڭ الدارىڭىزعا ەڭبەك كودەكسىنىڭ، ەلىمىزدەگى بارلىق زاڭداردىڭ، سونىڭ ىشىندە كوشى-قون زاڭناماسىنىڭ بۇزىلۋىنا جول بەرمەۋ مىندەتىن قويامىن. ادال، قولايلى جاعداي بارلىق جۇمىسشىلارعا جاسالۋى كەرەك. ءبىز ءوز تاراپىمىزدان سىزدەردىڭ باستامالارىڭىزدى كۇتىپ وتىرمايمىز، جۇمىس ىستەيمىز، ەگەر جاعدايدى ءوز ەرىكتەرىڭىزبەن وزگەرتكىلەرىڭىز كەلمەسە، زاڭعا سايكەس ارەكەت ەتۋگە كۇشىمىز جەتەدى. وبلىس اكىمىنىڭ ءبىرىنشى ورىنباسارى جەتەكشىلىك ەتەتىن ۆەدومستۆوارالىق كوميسسيا بارلىق ماسەلەلەردى قاراپ، ولاردىڭ شەشىلۋىن باقىلاۋدا ۇستايدى."،- دەدى جينالعاندارعا ايماق باسشىسى.
