قازاقستاننىڭ ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ 2 شىلدەدە نۇر-سۇلتاندا وتكەن بريفينگىدە تەڭىزدەگى جەرگىلىكتى جانە شەتەلدىك جۇمىسشىلار اراسىنداعى جالاقى ايىرماشىلىعى تۋرالى ايتتى دەپ جازادى Qamshy.kz اقپارات اگەنتتىگى ازاتتىق راديوسىنا سىلتەمە جاساپ.

ساپاربايەۆتىڭ ايتۋىنشا، تەڭىزدەگى جەرگىلىكتى جانە شەتەلدىك جۇمىسشىلار اراسىنداعى جالاقى ايىرماشىلىعىن تەكسەرۋ ءۇشىن ارنايى جۇمىسشى توبى قۇرىلعان.

"قازاقستان زاڭىنا سايكەس ەڭبەكاقىدا ايىرماشىلىق بولماۋى كەرەك. ءقازىر سونى جۇمىسشى توبى تەكسەرەدى. جۇمىس بەرۋشىلەردەن نەگە ايىرماشىلىق بار ەكەنىن انىقتايدى. ودان كەيىن مۇنى قالپىنا كەلتىرۋگە جۇمىس جاسايمىز. ال تەڭىزدەگى جاعداي باقىلاۋىمىزدا"، – دەدى ساپاربايەۆ.

ءمينيستردىڭ سوزىنشە، ارنايى كوميسسيا قۇرامىنا ەڭبەك جانە حالىقتى الەۋمەتتىك قورعاۋ مينيسترلىگى، اتىراۋ وبلىسى اكىمدىگى مەن ەڭبەك ينسپەكسياسى، "تەڭىزشيەۆرويل" مەن وعان قارايتىن مەردىگەر مەكەمە سonsolidated Contracting Engineering and Procurement S.A.L Offshore (CCEP) وكىلدەرى كىرگەن.

سونىمەن قاتار ساپاربايەۆ "29 ماۋسىمدا بولعان جانجال كەزىندە جۇمىسشىلار جالاقى مەن جۇمىس جاعدايى تۋرالى ماسەلە كوتەرمەدى" دەپ مالىمدەدى.

"ول جەردە كوتەرىلگەنى – تۇرمىستىق ماسەلە ەدى. ءبىراق ءقازىر ولاردىڭ ەڭبەكاقىسى، تۇرمىستارى، ەڭبەك قاۋىپسىزدىگى تەكسەرىلەدى"، – دەدى ساپاربايەۆ.

29 ماۋسىمدا اتىراۋ وبلىسى جىلىوي اۋدانى تەڭىز كەنتىندە "تەڭىزشيەۆرويلدىڭ" مەردىگەرى Consolidated Contracting Engineering and Procurement S.A.L Offshore (CCEP) كومپانياسىنىڭ جۇمىسشىلارى اراسىندا جانجال شىققان.