اتىراۋداعى قاقتىعىستان زارداپ شەككەن يوردانيالىقتار بولعان وقيعانىڭ ءمان-جايىن ءتۇسىندىردى دەپ جازادى Qamshy.kz اقپارات اگەنتتىگى en.royanews.tv سايتىنىڭ دەرەگىن نەگىزگە الىپ. 

ايتا كەتسەك، يوردانيالىقتار مەن ليۆاندىقتار 2 شىلدەدە ەلدەرىنە ورالعان بولاتىن. 

ينجەنەر فادي باكاين قاقتىعىستىڭ قالاي باستالعانىن ايتىپ بەردى. 

— قاقتىعىس سەنبى كۇنى تاڭەرتەڭ باستالدى. ادامدار جينالىپ، نارازىلىق ءبىلدىردى. سول كەزدە بارلىق شەتەلدىك قىزمەتكەرلەردى اۆتوبۋسقا مىنگىزىپ، وقيعا ورنىنان الىس جەرگە اپاردى. ءبىزدى دە ءۇش اۆتوبۋستىڭ بىرىنە وتىرعىزدى. كەيىن ءبىزدى قازاقتار اياماي ۇرىپ-سوعا باستادى، - دەيدى فادي باكاين. 

سونىمەن بىرگە فادي ءوزىنىڭ نە سەبەپتى تاياق جەپ جاتقانىن تۇسىنبەگەنىن ايتتى. 

— العاشىندا ءبارى تۇسىنىكسىز بولدى. نە سەبەپتى قازاقتار ءبىزدى ۇرىپ-سوققانىن سوڭىنا دەيىن تۇسىنبەدىك. سويتسە، قاقتىعىسقا الەۋمەتتىك جەلىدە تارالعان سۋرەت سەبەپ بولعان ەكەن. ءبىز ونى كەيىن بىلدىك.

سونداي-اق شەتەلدىك جۇمىسشى الەۋمەتتىك تەڭسىزدىكتىڭ بولماعانىن ايتتى. 

— وسىعان دەيىن ديرەكتورلار مەن جۇمىسشىلار بىرگە تاماق ىشەدى. ەشقانداي الالاۋشىلىق بولمادى، - دەيدى زارداپ شەككەن يوردانيالىق ازامات.