ماڭعىستاۋ وبلىسىنىڭ اقتاۋ قالاسىندا اۋىلدىق جەردەگى ايەل-كاسىپكەرلەرگە ارنالعان سەمينار ءوتتى. «اۋىلدىق جەرلەردە ايەلدەر كاسىپكەرلىگىن دامىتۋ» اتتى تەگىن شەبەرلىك ساباعى ازيا دامۋ بانكىنىڭ قولداۋىمەن «اتامەكەن» ق ر ۇكپ ۇيىمداستىرىلدى.

سەمينارعا وبلىستىڭ بارلىق اۋدانىنان 60-قا جۋىق ايەل كاسىپكەر قاتىستى. ولاردىڭ قاتارىندا شارۋا قوجالىقتارىنىڭ باسشىلارى، وندىرىستىك كاسىپورىنداردىڭ باسشىلارى مەن جەكە كاسىپكەرلەر بار. ەكى كۇندىك وقىتۋدا بيزنەس-ترەنەر تاجىريبەلىك تاپسىرمالار مەن كەيستەر ارقىلى ايەلدەردى كاسىپكەرلىك نەگىزدەرىنە، بۋحگالتەرلىك جانە باسقارۋ ەسەبىنە ۇيرەتىپ، سالىق پەن ينۆەستيسيا تارتۋ سۇراقتارىنا جاۋاپ بەردى. سونىمەن بىرگە تىڭداۋشىلار جەكە برەندتى دامىتۋ ماڭىزدىلىعىن، پيار جۇمىسىن ۇيلەستىرۋ مەن ينتەرنەت-ماركەتينگ نەگىزدەرى تۋرالى ءبىلىپ قايتتى.

وقىتۋ اياسىندا قاتىسۋشىلارعا قازاقستانداعى بيزنەستى جۇرگىزۋدەگى قارجىلاي جانە قارجىلاي ەمەس قولداۋ تۋرالى كاسىپكەرلەر پالاتاسىنىڭ ماماندارى تانىستىردى. ال كاسىپكەرلىكتى قولداۋ باعدارلامالارى جونىندە «دامۋ» كاسىپكەرلىكتى دامىتۋ قورى» اق وڭىرلىك فيليالىنىڭ قىزمەتكەرلەرى كەڭىنەن توقتالدى.

سونىمەن بىرگە ەكىنشى دەڭگەيلى بانكتەر مەن شاعىن نەسيەلىك ۇيىمداردىڭ وكىلدەرى نازىك جاندى ىسكەرلەرگە شاعىن جانە ورتا بيزنەس سۋبەكتىلەرىنىڭ جوبالارىن قارجىلاندىرۋ باعدارلامالارى مەن ولارعا قاتىسۋ شارتتارىن ءتۇسىندىردى.

قاتىسۋشىلار ءوز كەزەگىندە سەميناردىڭ كاسىبي بىلىكتىلىكتەرىن كوتەرۋ ءۇشىن قاجەتتى شارا ەكەنىن، سونداي-اق، اۋىلدىق جەرلەردە جاپپاي كاسىپكەرلىكتى دامىتۋ يدەياسىن تانىمال ەتۋدىڭ ماڭىزدىلىعىن اتاپ ءوتتى. جالپى وڭىردە 52 مىڭ كاسىپكەرلىك سۋبەكتىسى تىركەلگەن، ونىڭ 50%-عا جۋىعى ايەلدەر ەنشىسىندە.

ايتا كەتۋ كەرەك، ازيا دامۋ بانكىنىڭ قولداۋى شەڭبەرىندە «اتامەكەن» ۇيىمداستىرۋىمەن تەگىن وقۋ سەمينارلارى ەلىمىزدىڭ 15 وڭىرىندە وتەدى.