ارىستاعى تۇرعىن ۇيلەردى قايتا قالپىنا كەلتىرۋ جۇمىستارى ءوڭىرىمىزدىڭ 8 ءىرى قۇرىلىس كومپانياسىنا جۇكتەلىپ وتىر.  ولار: «وڭداسىن ستروي»، «اق جول قۇرىلىس»، «اليانس لتد»، «اكتاۋ بس ستروي»، «اس قۇرىلىس»، «ايكوم لتد»، «شەبەر قۇرىلىس» جاۋاپكەرشىلىگى شەكتەۋلى سەرىكتەستىكتەرى. سونىمەن قاتار، قۇرىلىس جۇمىستارىنا ارىس قالاسىنىڭ جۇمىسسىز تۇرعىندارى تارتىلادى. قازىرگى تاڭدا قۇرىلىس جۇمىستارى قارقىن الۋدا. قاجەتتى تەحنيكامەن قامتاماسىز ەتىلىپ،  جۇمىسشىلار قۇرىلىستى باستاپ كەتكەن. ناقتىراق ايتقاندا، 5 كوشەنىڭ 12 ءۇيىن جوندەۋ جانە 1 تۇرعىن ءۇيدى قايتا سالۋ جۇمىستارى باستالدى. ازىرگە  جۇمىلدىرىلعان جۇمىسشىلار سانى 50 ادامدى قۇراپ وتىر جانە ادامدار سانى كۇن سايىن قاجەتتى كولەمگە دەيىن كوبەيە بەرمەك. كەشە، 2-شىلدە كۇنى قاجەتتى ماتەريالدار، سونىڭ ىشىندە 12 000 م² شاتىر جابىندىسى، 140 م³ اعاش جانە باسقا دا ءبىرىنشى كەزەكتە شاتىرلاردى جوندەيتىن قۇرىلىس جابدىقتارى الىنعان. سونىمەن قاتار، 5 كوشەدە ورنالاسقان ۇيلەردىڭ تەرەزەلەرىنىڭ ولشەمدەرى الىنىپ، دايىندالىپ جاتىر جانە بۇگىننەن باستاپ 2 كوشەنىڭ تۇرعىندارى ۇيلەرىنە ورناتىلادى.

«ارىس قالاسىن قالپىنا كەلتىرۋ بويىنشا ەل پرەزيدەنتى ق.توقايەۆ ۇكىمەتكە جانە وبلىس اكىمدەرىنە ارنايى تاپسىرما بەرگەن بولاتىن. ماڭعىستاۋ وبلىسى نومەرى 4ء-شى سەكتورعا جاۋاپتى رەتىندە بەكىتىلگەن. بۇل اۋماقتا 8 كوشە، 331 ءۇي ورنالاسقان. ال جوندەۋگە جاتاتىن ۇيلەردىڭ سانى – 275، جوندەۋگە كەلمەيتىن، ياعني بۇزىپ، جاڭا ءۇي سالۋدى قاجەت ەتەتىن ۇيلەر سانى – 3. بۇل ۇيلەردىڭ بارلىعى دا جەكە تۇرعىن ۇيلەر.  بۇل جۇمىستارعا جاۋاپتى رەتىندە وبلىس اكىمىنىڭ ورىنباسارى قيلىباي نۇرداۋلەت يگىلىك ۇلى بەكىتىلدى. وڭىردەن اتتانعان 9 ەكسپەرتتىك مەكەمەنىڭ 18 وكىلى زارداپ شەككەن تۇرعىن ۇيلەردىڭ تولىقتاي دەفەكتىلىك اكتىلەرىن ازىرلەدى. جوندەۋ جۇمىستارى تامىز ايىنىڭ بىرىنە دەيىن اياقتالادى دەپ جوسپارلانۋدا»،-دەدى ءوڭىر باسشىسى س.ترۇموۆ.