اتىراۋدا قازاق ءتىلى مەن ادەبيەتىنەن وتكەن حالىقارالىق وليمپياداعا التى مەملەكەتتەن 62 وقۋشى كەلدى دەپ حابارلايدى Qamshy.kz اقپارات اگەنتتىگى اتىراۋ وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.
كەشە، 6 شىلدەدە، قۇرمانعازى اتىنداعى مادەنيەت ۇيىندە قازاق ءتىلى مەن ادەبيەتىنەن حالىقارالىق وليمپيادا جۇلدەگەرلەرىن ماراپاتتاۋ سالتاناتى بولدى. جۇڭگو، موڭعوليا، قىرعىزستان، رەسەي، يران، وزبەكستان مەملەكەتتەرىنەن كەلگەن 62 وقۋشى انا تىلدەرىنەن بىلىمدەرىن سىنعا سالدى. جۇلدەگەرلەرگە وبلىس اكىمىنىڭ ءبىرىنشى ورىنباسارى سەرىك شاپكەنوۆ ماراپاتتارىن تاپسىردى.
-قازاق دياسپوراسى وكىلدەرىنىڭ باسقا ەلدەردە تۇرسا دا، انا تىلدەرىن جەتىك مەڭگەرگەندەرى، ءوز تىلدەرىندە سويلەپ، بىلىمدەرىن جەتىلدىرەتىندەرى قۋانتادى. حالىق دانالىعىندا ايتىلعانداي، ءوز ءتىلىن ۇمىتقان ۇلت تامىرىن جوعالتادى. باسقا ەلدەردە تۇرسا دا، قازاق ءتىلىن مەڭگەرىپ، وتباسىلارىندا وسى تىلدە سويلەسەتىن وسىنداي بالالاردىڭ ارقاسىندا انا ءتىلىمىزدىڭ بولاشاعى باياندى بولارىنا سەنەمىن،-دەدى وليمپيادا قاتىسۋشىلارىنا سەرىك شاپكەنوۆ.
حالىقارالىق وليمپيادا قورتىندىسى بويىنشا 5 قاتىسۋشى التىن مەدال، 8 قاتىسۋشى كۇمىس، 15 قاتىسۋشى قولا مەدال يەلەندى.
"بالالار ءتۇرلى اتالىمدار بويىنشا دا ماراپاتتالدى. ۇزدىك كورسەتكىش كورسەتكەندەرگە قازاقستانداعى جوو-دا تەگىن وقۋعا سەرتيفيكاتتار، رەكتور گرانتتارى بەرىلدى"،- دەيدى وبلىستىق ءبىلىم بەرۋ باسقارماسى باسشىسىنىڭ مىندەتىن اتقارۋشى جانسۇلۋ تورەمۇراتوۆا.
وليمپيادا قورتىندىسى بويىنشا بارلىق بالالار انا تىلىنە دەگەن قۇرمەتتەرى ءۇشىن ءتۇرلى سىيلىقتارعا يە بولدى.
ايتا كەتۋ كەرەك، ماراپاتتاردىڭ كوپشىلىگىن وزبەكستان رەسپۋبليكاسىنان كەلگەن ەتنيكالىق قازاقتار جەڭىپ الدى.
