وڭىردەگى جۇمىس ساپارى بارىسىندا اسكەري ۆەدومستۆو باسشىسى گەنەرال-مايور نۇرلان ەرمەكبايەۆ ارىس ماڭىن قاراپ، ارسەنال مەن ىرگەلەس جاتقان اۋماقتى، سونداي-اق وق-دارىلەر قالدىقتارىن جويۋ بويىنشا پوليگوندى تەكسەردى دەپ حابارلايدى Qamshy.kz اقپارات اگەنتتىگى قورعانىس مينيسترلىگىنىڭ سايتىنا سىلتەمە جاساپ.
جۇمىس ءجۇرىپ جاتقان جەردە وق-دارىلەر قالدىقتارىن تازارتۋ جونىندەگى شارالاردى ورىنداپ جاتقان ينجەنەرلىك-ساپەرلىك، ماتەريالدىق-تەحنيكالىق بولىمشەلەر جانە اسكەري ءورت سوندىرۋشىلەر جەكە قۇرامىمەن قاۋىپسىزدىك شارالارىن ساقتاۋ جونىندە نۇسقاما جۇرگىزىلگەن.
قورعانىس ۆەدومستۆوسىنىڭ باسشىلىعى ءبىرقاتار ناقتى تاپسىرمالار بەردى. ءبىرىنشى كەزەكتە ادامداردىڭ قاۋىپسىزدىگىن قامتاماسىز ەتۋ. ەكىنشى كەزەكتە، وق-دارىلەردىڭ بولىكتەرىن ىزدەستىرۋ جانە شىعارۋ بويىنشا جۇمىستاردى اتقارىپ جۇرگەن اسكەري قىزمەتشىلەردىڭ قاۋىپسىزدىگىن ساقتاۋ.
سونداي-اق قولايسىز اۋا-رايىندا تاۋلىك بويى جۇمىس ىستەپ جاتقان ق ر قك بولىمشەلەرىنىڭ جەكە قۇرامىمەن كەزدەسۋ ءوتتى. جوعارعى باس قولباسشى اتاپ وتكەندەي، توتەنشە جاعدايلاردىڭ سالدارىن جويۋ جونىندەگى اسكەري قىزمەتشىلەردىڭ جۇمىسى جاۋىنگەرلىك تاپسىرمانى ورىنداۋعا بايلانىستى. توتەنشە جاعداي سەبەپتەرىن ايقىنداۋ بويىنشا ىشكى قىزمەتتىك تەرگەپ-تەكسەرۋدى جۇرگىزۋ ءۇشىن ن. ەرمەكبايەۆپەن بىرگە ق ر قورعانىس مينيسترلىگى باس ينسپەكسياسىنىڭ كوميسسياسى كەلدى.
ەستەرىڭىزگە سالا كەتسەك، وسى وڭىردە جارىلماعان وق-دارىلەردى تيەۋ جانە شىعارۋ، سونداي-اق وق-دارىلەردىڭ قالدىقتارىن جويۋ جونىندەگى جۇمىستار باستالعانىن حابارلاعان بولاتىنبىز. قالا تۇرعىندارى ءۇشىن اتالعان جۇمىستار ەش ءقاۋىپ تۋعىزبايدى.
پىكىر قالدىرۋ