«ادىلدىك ىزدەپ، شارشادىق!». اقتوبە وبلىسىندا جۇمباق جاعدايدا كوز جۇمعان 19 جاستاعى بويجەتكەننىڭ تۋىستارى پوليسەيلەردىڭ ءىستى دۇرىس تەكسەرمەي جاتقانىن ايتىپ، شاعىمداندى دەپ حابارلايدى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ.
مارقۇمنىڭ مۇردەسىن جاقىندارى اۋىلداعى ءبىر ءۇيدىڭ مونشاسىنان تاۋىپتى. الايدا ولار قىزدارىنىڭ ول ۇيگە بارماق تۇگىلى، ءتىپتى جاقىن ارالاسقان ادامدارى ەمەستىگىن ايتىپ وتىر. ال، ساراپتاما قورىتىندىسىندا بويجەتكەننىڭ يىستەن ۋلانعانى جازىلىپتى. ءبىراق، جاقىندارى مۇنىمەن كەلىسپەي، مۇردەگە ەكسگۋماسيا جاساپ، ناعىز قىلمىسكەردى تاپسىن دەپ وتىر.
قايعىلى وقيعا وسى جىلدىڭ ءساۋىر ايىندا بادامشا اۋىلىندا بولعان. سول كۇنى جۇلدىز تۇندەلەتىپ ءدامحاناداعى جۇمىسىنان قايتىپتى. الايدا، ۇيىنە جەتپەگەن. قىزىنىڭ ءولى دەنەسى مونشادا جاتقانىن اناسىنا كۇندىزگى 11-لەردە حابارلاپتى. تاۋىپ العان - مونشا قوجايىنىنىڭ ۇلى ەكەن. ول جەرگە بويجەتكەنىڭ قالاي بارعانى، كىممەن بارعانى جاقىندارىنا ءالى كۇنگە دەيىن جۇمباق. ولار ءبىراۋىزدان قىزدى بىرەۋلەر الداپ شاقىرىپ الىپ، قاستاندىق جاساعان دەپ سانايدى.
"ەكى جارىم اي ءوتتى، ەش ناتيجە جوق. پوليسيا دۇرىس جۇمىس ىستەمەيدى. ولار گازعا ۋلانعان دەگەن قورىتىندى شىعاردى. ساراپتامادا گازعا ۋلانعان دەپ بەرگەن، ءبىراق گاز ۋچاسكەسىنىڭ نورماعا سايكەس دەگەن قاعازى بار. ولار ءالى كۇنگە تابا الماي وتىر قىلمىسكەردى. ىزدەگىسى دە كەلمەيدى"، - دەيدى مارقۇمنىڭ اعاسى مارات تولەشوۆ.
ءىستىڭ تۇسىنىكسىز تۇستارىنىڭ كوپ ەكەنىن اناسى دا ايتۋدا. ءتىپتى، كىنانىڭ ءبارىن قىزىما ارتىپ، جەڭىلجۇرىستى قىلىپ كورسەتكىلەرى كەلىپ وتىر دەپ نارازى.
"ولار قىزىمدى ءوز اجالىمەن ءولدى دەپ، ءىستى جىلى جاۋىپ قويعىلارى كەلىپ وتىرعان شىعار. ءبىراق، مەنىڭ جۇرەگىم سەزەدى. ەشقانداي گازعا ۋلانباعان. ونى ادەيى ولتىرگەن. قىزىمدى جەڭىل ءجۇرىستى قىلىپ كورسەتكىلەرى كەلەدى، ول ونداي ەمەس!" - دەدى اناسى كەنجە تولەشوۆا.
جۇلدىزدىڭ جاقىندارى ونىڭ اقجارقىن، پىسىق، وعاش قىلىعى جوق بولعانىن ايتادى. بيىل كوللەدجدى اياقتاپ، ديپلوم الۋى كەرەك ەدى.
تولەشوۆتەر پوليسياعا دا، پروكۋرورلارعا دا شاعىمدانعان. ازىرگە ەش ماردىمدى جاۋاپ المادىق دەپ وتىر. ال سوت-مەديسينالىق ساراپتاماسىنىڭ قورىتىندىسىنا كۇمانمەن قارايتىن جۇلدىزدىڭ اناسى مايىتكە ەكسگۋماسيا جاساۋدى تالاپ ەتۋدە.
پىكىر قالدىرۋ