ىستىقكولدە ءۇش كۇن ءىز-تۇزسىز جوعالعان اركاديي ەسىمدى قازاقستان ازاماتى نە جاعداي بولعانىن اڭگىمەلەپ بەردى دەپ جازادى Qamshy.kz اقپارات اگەنتتىگى sputniknews.kz سايتىنا سىلتەمە جاساپ.
وسى ۋاقىت ىشىندە ونى جەرگىلىكتى ميليسيونەرلەر مەن قۇتقارۋشىلار ىزدەگەن، دەگەنمەن ەر ادام قارا-وي اۋىلىنداعى دەمالىس ۇيىنە تاكسيمەن ءوزى ورالعان. ول ەكى تاۋلىك سۋدا بولعان، سكۋتەرى باتىپ كەتكەن سوڭ جاعالاۋعا دەيىن بىرنەشە كيلومەتر جۇزۋگە تۋرا كەلگەن
اركاديي ىستىقكولدى ءجۇزىپ ءوتۋ ويىندا بولماعانىن ايتادى. دەگەنمەن سكۋتەردى جالعا العان سوڭ وڭتۇستىك جاعالاۋعا بارىپ، سوندا سەرۋەندەۋگە شەشىم قابىلدايدى. 15-20 مينۋتتان كەيىن بەنزينى تاۋسىلعان. ول كولدىڭ ورتاسىندا قۇتقارۋ جيلەتى جانە سۋعا تۇسۋگە ارنالعان ىشكيىممەن قالعان.
"وڭتۇستىك جاعالاۋ جاقىن دەپ ويلادىم. جاعالاۋعا دەيىن شامامەن 7 كيلومەتر قالدى. سكۋتەردە وتىرعان كۇيى قولمەن ەسە باستادىم. دەگەنمەن وسى كەزدە قاتتى داۋىل تۇرىپ، ادام بويىمەن بىردەي تولقىندار پايدا بولدى. جەل مەنى كەرى قاراي اكەتتى"، - دەيدى ەر ادام.
وسىلايشا ول جاعالاۋعا جەتە الماعان، ەكى كۇن سكۋتەردە تۇنەگەن. ەكىنشى ءتۇنى اسپان اشىق بولعان، جاعالاۋدان جارىق كورىنگەن. الايدا داۋىل قايتا باستالادى. تاڭەرتەڭ اركاديي كادجي-سا اۋىلى اۋماعىندا بولعان. سكۋتەرى سۋعا باتىپ كەتكەن كەزدە ءجۇزىپ جەتۋگە شەشىم قابىلدايدى.
"ءۇمىتىمدى ۇزبەدىم، ناتيجەسىندە جاعالاۋعا جەتىپ، تالدىڭ تۇبىندە دەمالدىم"، - دەپ تولىقتىردى اركاديي.
ول وزىمەن بىرگە اقشا الىپ جۇرگەن، ەلدىمەكەندە شورتى، اياقكيىم ساتىپ الىپ، تاكسيمەن بالىقشى ەلدى مەكەنىنە جەتكەن، سول جەردەن پانسيوناتقا بارادى.
ايتا كەتەيىك، سكۋتەردىڭ يەسى شىعىندى وتەۋ تۋرالى ارىز تۇسىرگەن. اركاديي اقىسىن تولەۋگە ۋادە بەردى.
پىكىر قالدىرۋ