بۇگىن مۇحتار جاكىشيەۆتى مەرزىمىنەن بوساتۋ جونىندە سوت وتىرىسى ءوتىپ جاتىر دەپ جازادى Qamshy.kz اقپارات اگەنتتىگى. سوت وتىرىسىنا مۇحتار جاكىشيەۆتى قولداۋعا 50-گە جۋىق ادام كەلدى. 10 جىلدان استام ۋاقىت تۇرمەدە جازاسىن وتەگەن مۇحتار جاكىشيەۆ كىم؟ Qamshy.kz اقپارات اگەنتتىگىنىڭ ءتىلشىسى بانكروت بولعان "قازاتومونەركاسىپتى" الەمدەگى ءبىرىنشى ونەركاسىپكە اينالدىرعان جاكىشيەۆ تۋرالى دەرەكتەردى وقىرمان نازارىنا ۇسىنادى. 

مۇحتار جاكىشيەۆ 1963 جىلى 28 ماۋسىمدا الماتى قالاسىندا دۇنيەگە كەلگەن. اكەسى ەركىن عازيز ۇلى جاكىشيەۆ زاڭ عىلىمدارىنىڭ دوكتورى، قازاق مەملەكەتتىك ۋنيۆەرسيتەتى زاڭ فاكۋلتەتىنىڭ كريميناليستيكا كافەدراسىنىڭ مەڭگەرۋشىسى بولعان. ال اناسى حيميا عىلىمدارىنىڭ كانديداتى، قازاق كسر عىلىم اكادەمياسىنىڭ حيميا ينستيتۋتىندا جۇمىس ىستەدى.

مۇحتار جاكىشيەۆتىڭ 4 قىزى جانە 1 ۇلى بار. ءوزى ماسكەۋ ينجەنەرلىك فيزيكا ينستيتۋتىن ينجەنەرلىك فيزيكا ماماندىعى بويىنشا بىتىرگەن، ماسكەۋ ينجەنەرلىك-فيزيكا ينستيتۋتىنىڭ اسپيرانتى جانە زاڭ عىلىمدارىنىڭ كانديداتى. العاشقى ەڭبەك جولىن قازۇۋ-دا ءمۇعالىم بولىپ باستاعان مۇحتار جاكىشيەۆ قازاتومونەركاسىپ ۇلتتىق كومپانياسىنىڭ پرەزيدەنتى لاۋازىمىنا دەيىن كوتەرىلدى. 

ۋران نارىعى تۋرالى جازعان شەتەلدىك باسىلىمدار مۇحتار جاكىشيەۆ تۋرالى ۋران سالاسىنداعى دانىشپان دەپ جازىپ ءجۇردى. 10 جىل ىشىندە مۇحتار جاكىشيەۆ ءوزى باسقارعان "قازاتومونەركاسىپتى" الەمدەگى ءنومىرى ءبىرىنشى كاسىپورىنعا اينالدىردى. 

2009 جىلى مامىردا ۇستالعان مۇحتار جاكىشيەۆكە سىبايلاس جەمقورلىق قىلمىسىن جاسادى دەپ ايىپ تاعىلىپ، 14 جىلعا سوتتالعان. ول جازاسىن وتەۋگە الدىمەن الماتى وبلىسىنداعى زارەچنىي كەنتىندەگى تۇرمەگە جىبەرىلگەن، كەيىن قاراعاندى وبلىسىنىڭ دولينكا كەنتىندەگى قاتاڭ رەجيمدەگى اك-159/6 كولونياسىندا بولدى. 2015 جىلى تۋىستارى، ادۆوكاتى مەن قۇقىق قورعاۋشىلاردىڭ ءوتىنىشىنىڭ ارقاسىندا ول دولينكادان قايتا زارەچنىيعا جىبەرىلگەن. ءبىراق 2017 جىلى ۇقك-نىڭ بۇرىنعى ءتوراعاسى نارتاي دۇتبايەۆتىڭ ىسىنە قاتىستى تەرگەۋ ىسىنە قاتىسۋ ءۇشىن استانا قالاسىنىڭ يزولياتورىنا ەتاپپەن جىبەرىلگەن. تەرگەۋ ءىسى اياقتالعان سوڭ مامىر ايىندا دولينكاعا، ال شىلدە ايىنان بەرى سەمەي قالاسىنداعى قاتاڭ رەجيمدەگى كولونيادا جازاسىن وتەپ جاتىر.

ەسكە سالا كەتسەك، «قازاتومپروم» ەكس-باسشىسىنىڭ ادۆوكاتى نۇرلان بەيسەكەيەۆ سوڭعى مەديسينالىق تەكسەرىلۋدەن سوڭ ونىڭ باس مي جۇيەسىندە اقاۋ بار ەكەنى انىقتالعانىن ايتقان بولاتىن.  كەيىن بىلتىرعى جىلدىڭ 17 شىلدەسىندە جاكىشوۆتى قاراعاندى وبلىسىنداعى كولونيادان شقو-وبلىسى سەمەي قالاسىنداعى قاتاڭ رەجيمدى كولونياعا اۋىستىردى. وسىنىڭ سەبەبىنەن مۇحتار جاكىشيەۆتىڭ دەنساۋلىعى تاعى دا ناشارلاي ءتۇستى.

ال جازدا ونىڭ جاعدايى مۇلدەم اسقىنا باستادى. جاكىشيەۆ ءۇشىنشى توپتاعى مۇگەدەك قاتارىنا قوسىلىپ، جۇمىس جاساۋ قابىلەتىنىڭ 50 پايىزىنان ايىرىلدى. سونىمەن بىرگە مۇحتار جاكىشيەۆتىڭ جوعارى قان قىسىمنىڭ كەسىرىنەن كوزدىڭ ىشكى تور قابىعى جارىلىپ كەتكەن. كۇز  مەزگىلىندە قاراعاندى قالاسىندا جاكىشيەۆتىڭ كوزىنە وپەراسيا جاسالدى. 

بۇل از بولعانداي، قىركۇيەك ايىندا مۇحتار جاكىشيەۆتىڭ اناسى قاتتى سىرقاتتانىپ قالدى. جاكىشيەۆ ءحال ۇستىندە جاتقان ناۋقاس اناسىمەن كەزدەسۋىنە رۇقسات بەرۋىن سۇراپ، ءوتىنىش جازدى. الايدا 18 قىركۇيەكتە مۇحتار جاكىشيەۆتىڭ اناسى قايتىس بولدى. كەيىن قارالى حاباردى ەستىگەن مۇحتار جاكىشيەۆ اناسىن سوڭعى ساپارعا شىعارىپ سالۋدى سۇراپ، ءوتىنىش جازدى. ءبىراق وعان مۇنداي مۇمكىندىك بەرىلمەدى.