تۇرىكمەنستان پرەزيدەنتىنىڭ بالاسى سەردار بەردىمۇحامەدوۆ اقال ۋالاياتىنىڭ حاكىمى بولىپ تاعايىندالعانىنا دا ءبىرشاما ۋاقىت ءوتتى. الايدا وعان قاتىستى ەل اراسىندا نەشە ءتۇرلى اڭگىمەلەر ءجۇرىپ جاتىر. جەرگىلىكتى تۇرعىندار مەن ۋالايات قىزمەتكەرلەرىنىڭ اراسىندا جاسىرىن ساۋالناما جۇرگىزگەن hronikatm.com سايتى وسى اپتانىڭ ورتاسىندا ءمالىمسىز ءبىرقاتار دەرەكتەردى جاريا ەتتى دەپ حابارلايدى Qamshy.kz اقپارات اگەنتتىگى.
ايتا كەتەر ءبىر جايت، احال ۋالاياتىنىڭ ورتالىعى انناۋ قالاسىندا ورنالاسقان. بۇل شامامەن اشحاباد قالاسىنان بار-جوعى 8 شاقىرىم جەردە. ءبىراق كىشى بەردىمۇحامەدوۆ جۇمىسىنا جان-جاعىن قورشاعان كۇزەتشىلەرىمەن كەلەدى. كولىگىن قورشاپ ارنايى موتوسيكلدەر جۇرەدى. اكىمشىلىكتىڭ اۋلاسىنا ول وسىلاي ارنايى كورتەجبەن كىرەدى. حاكىم ساردار عيماراتقا ەنگەن كەزدە دالىزدە ەشكىم بولماۋى قاجەت جانە جۇمىس كەزىندە ەشقانداي داۋىس ەستىلمەۋى قاجەت. ول نەگىزىنەن ۋالايات اۋماعىندا ۇلكەن ءىس-شارا وتكەن كەزدە عانا جۇرتشىلىقتىڭ الدىنا شىعادى ەكەن.
جەرگىلىكتى شەنەۋنىكتەردىڭ ايتۋىنا قاراعاندا، پرەزيدەنتتىڭ ۇلىنىڭ قابىلداۋىنا ەشكىم كىرە المايدى. ونىڭ قابىلداۋ بولمەسىنىڭ الدىندا ارنايى كۇزەت تۇرادى. بۇرىنعى حاكىمدىكتە مۇنداي قىزمەت مۇلدە بولماعان. عيماراتتا ۇيالى تەلەفونمەن بايلانىس جاساۋعا تىيىم سالىنعان.
جەرگىلىكتى اتقامىنەرلەردىڭ ايتۋىنا قاراعاندا، ساردار بەردىمۇحامەدوۆتىڭ جەرگىلىكتى شەنەۋنىكتەرگە ءجيى ايتاتىن ەڭ سۇيىكتى ءسوزى «موينىڭدى جۇلىپ الامىن» ەكەن.
ال احال ۋالاياتىنىڭ حالقى «ساردار بەردىمۇحامەدوۆ بۇل قىزمەتتە ۇزاق وتىرمايدى. ارى كەتسە، ءبىر جىل بولۋى مۇمكىن. سوسىن تاعى جوعارى لاۋازىمعا كوتەرىلەدى» دەپ وتىر.
وسى ۋاقىتقا دەيىن ساردار احال ۋالاياتى حاكىمىنىڭ ورىنباسارى بولىپ بار-جوعى التى اي عانا ىستەگەنى بەلگىلى. دەمەك ول حاكىم بولىپ تا ۇزاق وتىرمايدى.
