كەزدەسۋدە قازاقستاننىڭ تۇڭعىش پرەزيدەنتىنە پارتيانى جاڭعىرتۋ جوسپارىن جۇزەگە اسىرۋ بارىسى، سونداي-اق «Nur Otan» پارتياسىنىڭ تۇركىستان وبلىسى ارىس قالاسىن قالپىنا كەلتىرۋ جۇمىستارىنا اتسالىسۋى تۋرالى باياندالدى دەپ حابارلايدى Qamshy.kz اقپارات اگەنتتىگى Elbasy.kz سايتىنا سىلتەمە جاساپ.

– «Nur Otan» – ەلىمىزدەگى باستى ساياسي كۇش. پارتيا حالىققا جاقىن بولىپ، ونىڭ مۇڭ-مۇقتاجىن بىلۋگە جانە وعان قولداۋ بىلدىرۋگە ءتيىس. قوعامدا تۋىندايتىن ماسەلەلەردى شەشۋگە كومەكتەسۋ كەرەك. سونداي-اق، پارتيامىزدىڭ كادرلىق قۇرامىن مۇقيات زەرتتەۋ قاجەت. «Nur Otan» ءوز جۇمىسىن ودان ءارى جەتىلدىرۋدى جالعاستىرا بەرۋگە ءتيىس، – دەدى نۇرسۇلتان نازاربايەۆ.

ەلباسى «Nur Otan» پارتياسىنىڭ وڭىرلەردەگى فيليالدارى مەن باستاۋىش پارتيا ۇيىمدارىنىڭ جۇمىسىن جانداندىرۋدىڭ ماڭىزدىلىعىن اتاپ ءوتتى.

– باستاۋىش پارتيا ۇيىمدارىنىڭ جەتەكشىلەرىمەن، ساياسي كەڭەس مۇشەلەرىمەن، پارتيانىڭ وڭىرلەردەگى فيليالدارىنىڭ باسشىلارىمەن كەزدەسۋ جوسپارلانعان. ۇيىمنىڭ بارلىق بۋىنىنىڭ ويداعىداي جۇمىس ىستەۋىن قامتاماسىز ەتۋدىڭ ماڭىزى زور. سونداي-اق، پارتيانىڭ ماجىلىستەگى جانە ءماسليحاتتارداعى فراكسيالارى تاراپىنان ۇكىمەت پەن اكىمدەردىڭ جۇمىسىن باقىلاۋدى بارىنشا كۇشەيتۋ قاجەت، – دەدى قازاقستاننىڭ تۇڭعىش پرەزيدەنتى.

نۇرسۇلتان نازاربايەۆ پارتيالىق باقىلاۋ كوميسسيالارىنىڭ جانە ورتالىق پەن جەرگىلىكتى جەرلەردەگى سىبايلاس جەمقورلىققا قارسى ءىس-قيمىل كەڭەستەرىنىڭ جۇمىسىن جاقسارتۋ ماسەلەسىنە توقتالدى. حالىقپەن «كەرى بايلانىس» ورناتۋ قۇرالدارىنىڭ تيىمدىلىگىن ارتتىرۋ، سونىڭ ىشىندە پارتيانىڭ قوعامدىق قابىلداۋ ورىندارىنىڭ قىزمەتىن جاقسارتۋ ماسەلەلەرىنە دە نازار اۋدارىلدى.

كەزدەسۋ سوڭىندا ەلباسى پارتيانى قايتا جانداندىرۋ باعدارلاماسىن ازىرلەۋدى جانە ونى «Nur Otan» پارتياسىنىڭ ساياسي كەڭەسى بيۋروسىنىڭ قاراۋىنا شىعارۋدى تاپسىردى.