ماڭعىستاۋدا اۋقىمدى ارنايى وپەراسيا ءوتتى! ۇلتتىق قاۋىپسىزدىك كوميتەتى مەن ىشكى ىستەر مينيسترلىگى بىرلەسە وتكىزگەن شارانىڭ ناتيجەسىندە 4 بىردەي قىلمىستىق توپتىڭ جولى كەسىلدى. قىلمىستىق ىستە اتىس قارۋلارى مەن ءوق-دارى، سونداي-اق، ەسىرتكى ساقتاۋ، ادام ولتىرۋگە وقتالۋ، بوپسالاۋ، تاعىسىن تاعىلار قاراستىرىلعان. تەرگەۋ ورىندارىنا جەتكىزىلگەن توپ مۇشەلەرى وسىنداي اۋىر قىلمىستار بويىنشا كۇدىكتى بولىپ وتىر دەپ جازادى Qamshy.kz اقپارات اگەنتتىگى كتك تەلەارناسىنا سىلتەمە جاساپ.

تاڭعى الاگەۋىم. ءبىراق ارنايى جاساق جىگىتتەرىندە تىنىم جوق. ساۋىت-سايمانىن كيىنىپ، قارۋ-جاراعىن اسىنىپ، شۇعىل ماسەلەمەن اتتانىپ بارادى.

بەس قارۋ بويدا، جىگىتتەر ساقاداي ساي. اسكەري كولىگىنە قاراي اسىققان جىگىتتەردىڭ ماقساتى ءبىر. ماڭعىستاۋ وبلىسى اۋماعىندا جۇرگىزىلەتىن اۋقىمدى وپەراسيانى جۇزەگە اسىرۋ. شىمكەنتتتەگى سىرا زاۋىتىنىڭ يەسى بولعان، ايگىلى توقتار تولەشيەۆتىڭ ءىسى مەن بىرنەشە جىل بۇرىنعى اقتوبەدە بولعان ءدىني ەكسترەميستەردى قۇرىقتاۋ ەلدى ەلەڭ ەتكىزگەن ماڭىزدى وقيعا بولسا، وپەراسيانىڭ اۋقىمى جونىنەن بۇگىنگى شارا ولاردان الدەقايدا اسىپ ءتۇستى. ءبىر ۋاقىتتا 30-دان استام جەردە تەكسەرۋ شارالارى وتپەك. لەك-لەگىمەن اعىلعان مىنا اۆتوبۋستار سوعان باعىت العان ارنايى جاساق وكىلدەرى.

ءدال ءقازىر ارنايى جاساق جىگىتتەرى اسا ماڭىزدى تاپسىرمانى ورىنداۋعا ءتاس-تۇيىن، جولعا شىعىپ بارا جاتقان  ءسات. مەنىڭ ۇستىمدە جالپى سالماعى ون كەلىگە جەتەتىن تەمىر قالقان، باسىمداعى كاسكاعا وق وتپەيدى. وقيعانىڭ باسى-قاسىندا جۇرگەن جۋرناليستەردىڭ قاۋىپسىزدىگى دە ءجىتى ەسكەرىلگەن.

كولەمدى وپەراسياعا قاتىسۋعا تەلەارنا تىلشىلەرى مۇمكىندىك الىپ، كوپ ۇزاماي وقيعا ورنىنا جەتتى. ويلانارعا ۋاقىت جوق. جىگىتتەر ىسكە كىرىسۋگە دايىن ەكەندىكتەرىن ايتقانى سول ەدى، بۇيرىق تا بەرىلە قالدى.

- ءتيىستى ورىنعا كەلدىك. ارى قاراي بۇيرىقتى كۇتەمىز.

- تىڭداڭىزدار. شىعامىز، شىعامىز. العا، جىگىتتەر!

قالانىڭ قاق ورتاسىنداعى مىنا ءۇيدىڭ الدى تىم-تىرىس. مۇلگىگەن تىنىشتىقتىڭ ورتاسىندا قارۋ اسىنعان ۇلتتىق ۇلان جاساعى الدىمەن ەسىك-تەرەزەنىڭ ماڭىن تورۋىلعا الدى. كوزدەگەن پاتەر ءبىرىنشى قاباتتا. مۇزداي قارۋلانعان جىگىتتەر باسىپ كىرۋگە دايىن.

جاڭا عانا تاڭ اتقان شاق. جۇرت ءالى شىرت ۇيقىدا جاتىر. ال كۇدىكتىلەر ورنالاسقان پاتەر تۇرعىنى ەسىگىن اشار ەمەس. ارنايى جاساق ازىرگە ەسىك الدىن كۇزەتىپ تۇر. بىردەڭە بولسا، لاپ بەرىپ ىشكە كىرۋگە دايىن. ازىرگە كەلىسسوزدەر جۇرگىزىلىپ جاتىر. بولمايتىن بولسا، بۇزىپ كىرۋى مۇمكىن.

ىشتەگىلەر اقىرى ەسىك اشپادى. ۇلتتىق قاۋىپسىزدىك كوميتەتى وكىلدەرىنىڭ جەدەل قيمىلىنىڭ ارقاسىندا پاتەر ەسىگىن سىندىرىپ كىرۋگە سوت سانكسياسى دايىن بولدى. ءبارىنىڭ دە كۇتكەنى وسى ءسات ەدى. اپىر-توپىر باستالدى دا كەتتى.

ءتىلشى: ەكى بولمەلى پاتەردى جالداپ جاتقان سوقتالداي 5 جىگىت بىلايعى ادامعا بەيكۇنا كورىنەر. ءبىراق، ۇلتتىق قاۋىپسىزدىك كوميتەتىنىڭ ولاردى اڭدىپ جۇرگەنىنە ءبىراز ۋاقىت بولعان. قولعا ءتۇسىرۋدىڭ ءساتى بۇگىن تۇسكەندەي.

-فاميليا؟

-نۇرماحانوۆ.

-قايدان كەلدىڭ؟ 

-وزەننەن قىدىرىپ كەلدىم.

قىدىرىپ جۇرگەن جىگىتتەردىڭ شىن مانىندە نەمەن اينالىسقانىن تەرگەۋ انىقتاپ بەرەتىن كۇن دە الىس ەمەس. ال قالا ماڭىنداعى مىنا ءۇيدىڭ اۋلاسى ەندى بولماعاندا قارۋ-جاراق قويماسىنا اينالىپ كەتەر مە ەدى؟! الايدا ۇلتتىق قاۋىپسىزدىك كوميتەتىنىڭ اڭدۋىنا تۇسكەنىن مۇنداعى جىگىتتەر دە بىلمەسە كەرەك. اۋلاسىنان تابىلعان ەكى شولاق مىلتىق، ءبىر تاپانشا مەن اتىس وقتارى تاپ وسى ءۇيدىڭ بەيبىت تىرشىلىگىنە كەرەگى شامالى. ارالارىندا پوليسيا قولىنان سىتىلىپ كەتكىسى كەلگەندەر دە تابىلدى. كۇتپەگەن قوناقتار مىنا جىگىتتىڭ زارەسىن العانى بولار، قولىنا تەرەزە تۇسىنان كىسەن سالىندى.

-قاشىپ كەتپەك بولدىڭ با؟  

-جو-جوق...

بولمەسىنەن تاپانشا تابىلىپ جاتقاندا، ونىڭ قاشپايمىن دەگەنىنە سەنۋ قيىن. ال مىنا جاعدايدا پوليسيا جاساعى ۇيگە اسقان ساقتىقپەن كىردى. ارنايى جاساق اۋلاعا دىبىسسىز كىرىپ، الدىمەن ەسىكتىڭ ەكى جاعىنا ورنىعىپ الدى. ساقتىق كەرەك. تەمىر ەسىكتىڭ ارعى جاعىندا ولاردى نە كۇتىپ تۇرعانى ءبىر قۇدايعا عانا ايان. -

-سالەمەتسىز بە، بۇل – پوليسيا.

ء-يا. 

-ەسىكتى اشىڭىز. پوليسيا، جات! قولدى ارتقا قوي!

وسى كۇنى پوليسيا وكىلدەرىڭ الدىنان شىققان وڭكەي قارۋ-جاراق ساقتايتىندار، قونىستانعان پاتەرىن ەسىرتكى ورداسىنا اينالدىرعاندار، قارۋ كەزەنىپ، ەلدى تونايتىندار بولدى. مىنا جەردەگىلەر ەسىرتكىنى وڭدى-سولدى بۇرقىراتقانىن دالەلدەۋدىڭ ءوزى ارتىق سەكىلدى.

-نەگە ارنالعان بوتەلكە؟ ىشىندە تاعى بىرەۋى تۇر عوي؟ 

-بىلمەدىم ونى. بىلەتىن ادام بىلمەسە...

ماڭعىستاۋ وبلىسى اۋماعىندا بۇرىن-سوڭدى مۇنداي كولەمدى وپەراسيانىڭ جۇرگىزىلگەنى ەسىمىزدە جوق. وسى جولى پوليسيانىڭ نىساناسىنا ىلىككەن 4 بىردەي قىلمىستىق توپتىڭ جولى كەسىلدى. ادامدى ءولتىرۋ ماقساتىمەن ۇرلاۋ، اتىس قارۋ-جاراقتارى مەن ەسىرتكى ساقتاۋ، بىرەۋدى بوپسالاۋ - كۇدىككە الىنعان ارەكەتتەرى ادام شوشىرلىق. ونىڭ 20-دان استامى تەرگەۋ ورىندارىنا جەتكىزىلىپ، 16-سىنا قاتىستى بۇلتارتپاۋ شاراسى قولدانىلدى. سونداي-اق، ەسىرتكى زاتتار مەن ۇلكەن كولەمدە قىلمىستىق اتىس قارۋلارى تاركىلەندى.