كادىربەك اتامبايەۆ Facebook جەلىسىندەگى ءوزىنىڭ پاراقشاسىندا باس پروكۋراتۋرا «ءوز جانۇياسىنا تيەسىلى ەمەس مۇلىكتى تىركەپ جىبەرگەنىن» جازعان. «بيلىك وكىلدەرى ايتقان 120 مۇلىكتىڭ ىشىندەگى 101ء-ى اتامبايەۆقا دا، ونىڭ جانۇياسىنا دا تيەسىلى ەمەس ەكەنىن اتاپ كورسەتكىم كەلەدى. «كىرگىزاۆتوماش» بىرىككەن اكسيونەرلىك قوعامى 2007 جىلدان بەرى بىزگە تيەسىلى ەمەس» دەيدى ول.

"باس پروكۋراتۋرا مەنىڭ اكەم المازبەك اتامبايەۆتىڭ جانە ءبىزدىڭ تۋىستارىمىزدىڭ تاركىلەنگەن مۇلكى ماسەلەسىندە قوعام الدىندا ادەيى ايلا-شارعى جاسايدى دەپ سانايمىن. المازبەك شارشەنۇلىنا جانە بىزگە، وتباسىنا تيەسىلى دەلىنگەن 120 دانا مۇلىك جايلى مالىمدەمە جاساعىم كەلەدى. ءبىزدىڭ وتباسى مۇشەلەرىنىڭ اتىنا جازىلعان نارسە شىن مانىندە بىزگە تيەسىلى ەمەس، ال مەدياكەڭىستىككە شىعىپ جاتقان جالعان اقپاراتتار بيلىكتىڭ قارا پيارى دەپ سانايمىز"، - دەپ مالىمدەدى قادىر اتامبايەۆ.

كادىربەك اتامبايەۆتىڭ ايتۋىنشا، ولاردىڭ جانۇياسىندا «كىرگىزستان» بانكىندە 2002 جىلى اشىلعان جالعىز ەسەپ-شوت بار. ال «اپرەل» تەلەارناسىنىڭ جالال-ابادتا مۇلكى جوق. تەلەراديو ۇيىمدارى قاۋىمداستىعى دا اتامبايەۆتار جانۇياسىنا تيەسىلى ەمەس.

اتامبايەۆتىڭ ۇلى اكەسىنىڭ كوي-تاشتاعى ۇيدەن باسقا مۇلىكتەرى ول پرەزيدەنت بولعانعا دەيىن الىنعانىن ايتادى. ول باس پروكۋراتۋرا دەرەگىندە اتامبايەۆتىڭ مۇلكى رەتىندە اتالعان 1985 جىلى قايتىس بولعان اتاسىنىڭ ءۇيى دە ەنگىزىلگەنىنە تاڭعالىپ وتىر.

«اكەمىز توقسانىنشى جىلداردىڭ باسىنا باستاپ كاسىپكەر جانە مەسەنات رەتىندە بەلگىلى بولعانىن ەسكە سالعىم كەلەدى. ول - ءوزىنىڭ جاعدايىن مەملەكەتتىك قىزمەتتە ەمەس، بيزنەسپەن اينالىسىپ ءجۇرىپ جاساعان ادام» دەيدى كادىربەك اتامبايەۆ.

قىرعىزستان باس پروكۋراتۋراسى بيىلعى 16 تامىزدا المازبەك اتامبايەۆتىڭ مۇلىكتەرى، باعالى قاعازدارى، اكسيالارى، بانكتەگى ەسەپ-شوتتارى، «كىرگىزاۆتوماش»، «اپرەل-تۆ»، «مەديا فورۋم» كومپانيالارىنىڭ مۇلىكتەرىنە تىيىم سالىنعانىن حابارلاعان.

"مەن ناريمان تولەيەۆتىڭ بانكىندە دە قاراجاتىمىز بولعان دەگەن جالعان تىزىمگە تاڭعالدىم. شىن مانىندە بىزدە "قىرعىزستان" كوممەرسيالىق بانكىندە تۇرعان شوت بار جانە بۇل شوت 2002 جىلدان بەرى بولعان، ول كەزدە بانك شاريپا سادىباكاسوۆا يەلىگىندە ەدى. باس پروكۋراتۋرا ەلدەگى بارلىق بانكتى، ءتىپتى پاكىستاننىڭ ۇلتتىق بانكىنىڭ فيليالدارىن دا اتاپ وتۋگە شەشىم قابىلداعان سياقتى. باس پروكۋراتۋرا بارلىق تاركىلەنگەن ماشينالاردىڭ ءتىزىمىن جاريالاپ، ولاردىڭ بارلىعى 90-جىلدارى جانە 2000-جىلدارى شىعارىلعانىن جانە سوتقا دەيىن تارتىپ الىنعانىن مويىنداعىسى كەلمەيدى"، - دەپ اتاپ ءوتتى قىرعىزستاننىڭ ەكس-پرەزيدەنتىنىڭ ۇلى.

اتامبايەۆتىڭ ادۆوكاتى سلەساريەۆ تامىزدىڭ 15ء-ى كۇنى ازاتتىقتىڭ قىرعىز قىزمەتىنە بەرگەن سۇحباتىندا قاماۋدا وتىرعان بۇرىنعى پرەزيدەنتكە جالپى سانى 14 ايىپ تاعىلعانى تۋرالى مالىمدەگەن. ولاردىڭ اراسىندا بيلىك وكىلدەرىنە كۇش كورسەتۋ، جاپپاي تارتىپسىزدىك ۇيىمداستىرۋ، ادام ولتىرۋگە وقتالۋ، كەپىلگە ادام الۋ، زاڭسىز قارۋ ۇستاۋ جانە جەمقورلىققا بايلانىستى تاعى بىرنەشە ايىپ بار.

بيىل مامىردا قىرعىزستان پارلامەنتى بۇرىنعى پرەزيدەنتكە تيىسپەۋشىلىك تۋرالى زاڭعا وزگەرتۋلەر ەنگىزگەن. 27 ماۋسىمدا پارلامەنت اتامبايەۆتى ەكس-پرەزيدەنت جانە تيىسپەۋشىلىك مارتەبەسىنەن ايىرعان.

المازبەك اتامبايەۆ قىرعىزستاندى 2011-2017 جىلدارى باسقارعان. 2017 جىلعى قازاندا وتكەن سايلاۋدا ءوزىن قولدايتىن بيلىك پارتياسىنىڭ كانديداتى سوورونباي جەەنبەكوۆ پرەزيدەنت بولىپ سايلانىپ، قىزمەتىن كىرىسكەندە اتامبايەۆ وعان باتاسىن بەرگەن.