ق ر تۇڭعىش پرەزيدەنتى – ەلباسى نۇرسۇلتان نازاربايەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا 2019 جىلدى «جاستار جىلى» دەپ جاريالاعان بولاتىن. وسى ورايدا «Bolashaq» قاۋىمداستىعى جاستاردى قولداۋ ماقساتىندا «جاستار ۇيىمدارىنىڭ نەتۆوركينگى جانە تاجىريبە الماسۋى» جوباسىن ۇيىمداستىردى، دەپ جازادى Qamshy.kz اقپارات اگەنتتىگى.

اتالمىش شارانىڭ اشىلۋ سالتاناتىنا نۇر-سۇلتان قالاسى اكىمى ورىنباسارى، «Bolashaq» قاۋىمداستىعى كەڭەسىنىڭ ءتوراعاسى باقتيار ماكەن قاتىسىپ، جوبانىڭ ماڭىزدىلىعىن اتاپ ءوتتى. 

«ق ر اقپارات جانە قوعامدىق دامۋ مينيسترلىگىمەن بىرلەسىپ ۇلكەن شارانى باستاپ وتىرمىز. ءار ايماقتاعى كوشباسشى جاستاردى شاقىرىپ، ولاردىڭ پىكىرلەرىن ەستىپ، ءتۇرلى ماسەلەلەر قوزعاپ، جاڭا يدەيالاردى ءبولىسۋ ماقساتىندا باس قوستىق. جوبانىڭ جاستارعا بەرەر تاعىلىمى كوپ بولادى دەپ ويلايمىن»، – دەيدى «Bolashaq» قاۋىمداستىعى كەڭەسىنىڭ ءتوراعاسى.

نەتۆوركينگ بارىسىندا ۇەۇ مەن جاو اراسىنداعى ءوزارا قارىم-قاتىناستى جاقسارتۋ جانە تۇراقتى دامۋ، ۇەۇ تيىمدىلىگىن ارتتىرۋ ماسەلەلەرى ءسوز بولدى.

سونىمەن قاتار «ازاماتتىق باستامالاردى قولداۋ ورتالىعى» كەاق باسقارما ءتوراعاسى باتيما مۋكينا جاستارعا ارنالعان ءتۇرلى جوبالاردى تانىستىرىپ، ولارمەن بىرلەسە جۇمىس جاساۋ جولدارىن ءتۇسىندىردى.

ەلىمىزدىڭ ءتۇرلى ايماقتارىنان كەلەگەن 200 بەلسەندى جاس ءۇشىن ارنايى ماستەر-كلاسس، سەمينارلار مەن ترەنينگتەر ۇيىمداستىرىلدى.

«استانا جاستارى» كمم ۇيىمداستىرۋ ءبولىمىنىڭ باسشىسى شىڭعىس تىلەۋلين جيىنعا كەلگەن جاستاردى جوباعا بەلسەندى قاتىسۋعا شاقىرىپ، الداعى ۋاقىتتا جاڭا باستامالاردىڭ پايدا بولاتىنىنا سەنىم ءبىلدىردى.

سونداي-اق «جاستار» عىلىمي-زەرتتەرۋ ورتالىعىنىڭ ديرەكتورى لۋيزا ۋزاروۆا مەن قازاقستانداعى بۇۇ-نىڭ ەرىكتىلەر باعدارلاماسى جەتەكشىسى ريمما سابايەۆا ءسوز الىپ، ماڭىزدى جوبالار مەن الداعى اتقاراتىن جۇمىستار جايىندا ايتتى.

ءتۇرلى جاستار ۇيىمىنان كەلگەن قاتىسۋشىلار ءوز يدەيالارىن ءبولىسىپ، ونى دامىتۋ جولىندا قانداي قولداۋ بولاتىنىن جانە جوبانى قالاي جۇزەگە اسىرۋ كەرەكتىگى جايىندا تالقىلادى.

اتالمىش شارا الداعى ۋاقىتتا ەلىمىزدىڭ ءتورت ايماعىندا ۇيىمداستىرىلادى. وعان ءار وڭىردەن 1000-عا جۋىق بەلسەندى جاس قاتىسادى دەپ جوسپارلانعان.