الماتىدا اۆتوكولىكپەن ءۇش ادامدى قاساقانا قاققان كۇدىكتىلەردىڭ اناسى نازيرا اليكەيەۆا حالىققا ۇندەۋ جاسادى دەپ جازادى Qamshy.kz اقپارات اگەنتتىگى.
اليكەيەۆانىڭ ايتۋىنشا، ونىڭ ۇلدارى سول وقيعا بولعان كۇنى تۋىسقانىنىڭ تۋعان كۇنىن الماتىداعى كاراوكەلەردىڭ بىرىندە تويلاتقان.
"ينتەرنەتتە قارا Toyota Avensis ءۇش جىگىتتى قاعىپ كەتكەن وقيعانىڭ ۆيدەوسى پايدا بولدى. ءبىراق ول ۆيدەودا بۇعان دەيىن نە بولعانى تۇسىرىلمەگەن. شىن مانىسىندە وقيعا بىلاي بولعان. 25-ىندە جيەنىمنىڭ تۋعان كۇنى بولعان. ولار كاراوكەگە باردى. ءارى قاراي نە بولعانىن بىلمەيمىن. ەستۋىمشە، وقيعا گاگارين – ءال-فارابي قيىلىسىنىڭ ماڭىندا بولعان. ۇلكەن ۇلىم جاندوسقا (ءقازىر ونى قاماپ، ءۇش باپ بويىنشا ايىپتاپ وتىر. 6-دان 7 جىلعا دەيىن باس بوستاندىعىنان ايىرۋى مۇمكىن) كاراوكەدەن شىققان كەزدە شابۋىل جاساعان. ادەتتەگىدەي، كەلىسە الماي قالىپتى. شابۋىلداعان ادامدار ەرەسەكتەر، مەنىڭ ۇلىمنان الدەقايدا ۇلكەن. قۇرمەتتى قازاقستاندىقتار! مەن 1995 جىلى تۋعان جاندوس اليكەيەۆ پەن 1999 جىلى تۋعان دىنمۇحامەد اليكەيەۆتىڭ اناسىمىن. ۇلىم ىشپەيدى. كوپ بولسا، ەكى كرۋجكا ىشەتىن بولار. ونى توبەلەسقۇمار رەتىندە كورسەتىپ جاتىر، ءبىراق وندايىن بايقامادىم"، – دەدى نازيرا اليكەيەۆا Instagram جەلىسىندەگى پاراقشاسىندا.
26 تامىزدا الماتى كوشەسىندە توپ ادامدى اۆتوكولىكپەن قاساقانا قاققان ۆيدەو پايدا بولعان. ۆيدەودا اق ءتۇستى كولىك جول ۇستىندە تۇرعان بىرنەشە ادامنىڭ الدىنا كەلىپ توقتاپ، كەيىن شەگىنگەنى، ال قارا ءتۇستى كولىكتىڭ ءۇش ادامدى قاعىپ ءوتىپ، توقتاماستان كەتىپ قالعانى كورىنەدى.
وقيعا كەزىندە ءۇش ادام زارداپ شەككەن. بۇل ىسكە بايلانىستى الماتى پوليسياسى جەدەل تەرگەۋ جۇمىستارىن جۇرگىزىپ، قىلمىستىق كودەكستىڭ "جول قوزعالىسى ەرەجەسىن بۇزۋ"، "جول-كولىك وقيعاسى بولعان جەردەن كەتىپ قالۋ" جانە "بۇزاقىلىق" باپتارى بويىنشا تەرگەۋ باستالعانىن ايتقان.
27 تامىزدا قازاقستاننىڭ ىشكى ىستەر ءمينيسترى ەرلان تۇرعىمبايەۆ وسى قىلمىسقا قاتىسى بار كۇدىكتى ۇستالعانىن، ال تاعى ءبىر كۇدىكتى ءالى دە قاشىپ جۇرگەنىن ايتتى.
پىكىر قالدىرۋ