ەرتاي ايعالي ۇلى، «Qazaqstan dauiri» گازەتىنىڭ باس رەداكتورى:

پرەزيدەنت قاسىم-جومارت توقايەۆتىڭ حالىققا ارناعان تۇڭعىش جولداۋىن قاراپ شىقتىم.

«جولداۋدا نە ايتىلادى ەكەن؟» دەگەن وي كوپشىلىگىمىزدە بولعانى راس. حالىقتىڭ الەۋمەتتىك جاعدايىنا باسا ءمان بەرىپتى. حالىقتىڭ دا كوڭىلىنەن شىعادى دەگەن سەنىمدەمىن. ەڭ باستىسى، وسى ايتىلعان سوزدەر مەن كوتەرىلگەن ماسەلەلەر ءوز شەشىمىن تاۋىپ جاتسا، حالىققا ودان ارتىق نە كەرەك؟ كۇن تارتىبىندە تۇرعان وزەكتى ماسەلەلەر جەتىپ-ارتىلادى. قاي سالانى الساڭىز دا، بۇگىن ءسىز بەن ءبىز ايتىپ بەرە الاتىن دارەجەدەمىز.

جولداۋدى وقىپ وتىرىپ، «بۇل ماسەلە ەندى قالاي بولار ەكەن؟» دەگەن كۇماندى وي بولعانىن جاسىرمايمىن. ول بارىمىزگە بەلگىلى – جەر ماسەلەسى. كەزىندە اۋىلدا جايىلىم جەرلەر بولماي قالعانىن بىلەمىز. قاي حالىق بولسىن جەر – ول ءۇشىن ەڭ قاستەرلى، ەڭ قاسيەتتى قازىناسى. جەردى پايدالانا الاتىن شارۋاعا بەرىپ جاتسا، از عانا جىلدىڭ ىشىندە ول دا ءوز ناتيجەسىن بەرەتىنىنە سەنۋ كەرەك. ەل اراسىندا جەرگە قاتىستى قاۋەسەت جۇرگەنى تاعى بەلگىلى. پرەزيدەنت سوعان نۇكتە قويىپ: «مەملەكەت باسشىسى رەتىندە تاعى دا مالىمدەيمىن: جەرىمىز شەتەلدىكتەرگە ساتىلمايدى. وعان جول بەرىلمەيدى» دەيدى. سەنۋ كەرەك. وسىدان كەيىن ەندى بوس، داقپىرت سوزدەردى تىيعان ءجون دەپ ويلايمىن.

كوڭىلىمە قونعان تاعى ءبار ماسەلە – «باقىتتى وتباسى» باعدارلاماسى بويىنشا بيىل 6000 وتباسى ءۇي الادى دەلىنگەن. باسپانا قازاقتاردىڭ ەڭ ۇلكەن «باس اۋرۋى» ەكەنىن جاقسى بىلەمىز. 30 مىڭداي كوپبالالى وتباسى بولسا، 2-3 جىلدىڭ ىشىندە ولاردىڭ بارىندە ءۇي بولادى دەگەنى وتە قۋانتارلىق جاعداي. باعدارلاما الماتى قالاسىندا باستالىپ تا كەتتى. بيۋدجەتتىك نەسيەلەندىرۋ باعدارلاماسىنا قاتىسۋشى كوپبالالى وتباسىلارعا الماتى قالاسى اكىمدىگىنەن قۇنى 1 ملن تەڭگەلىك تۇرعىن ءۇي سەرتيفيكاتى بەرىلەدى. بۇل قاراجات زاەم الار كەزدە العاشقى جارنانى وتەۋگە ارنالعان. نەسيە تەك جاڭا تۇرعىن ءۇيدى ساتىپ الۋ ءۇشىن بەرىلەدى. زاەمنىڭ ەڭ جوعارعى سوماسى 15 ملن تەڭگەگە تەڭ. الماتىلىق تۇرعىندار «باقىتتى وتباسى» باعدارلاماسى بويىنشا پاتەردى وزدەرى ىزدەپ تابۋعا ءتيىس. بۇل بۇرىن-سوڭدى بولماعان تاماشا جاڭالىق قوي.

قازاق كوبەيۋ كەرەك. بۇگىن مەملەكەت كوپبالالى وتباسىلاردىڭ قولتىعىنان دەمەپ، ولاردىڭ وسىپ-ونۋىنە جاعداي جاساپ بەرسە، ەرتەڭ سول بالالار مەملەكەتتى كوتەرەتىن بولادى. مەن وعان سەنىمدىمىن. ويتكەنى، سان بار جەردە ءاردايىم ساپا بار.