30-31 تامىز كۇندەرى "سارايشىق" كوممۋنالدىق بازارىندا جانە "مۇنايشى" ستاديونىندا جەرگىلىكتى تاۋار وندىرۋشىلەردىڭ ءداستۇرلى اۋىلشارۋاشىلىق جارمەڭكەسى ءوتتى، – دەپ حابارلايدى اتىراۋ وبلىسىنىڭ وڭىرلىك كوممۋنيكاسيالار قىزمەتى.

جارمەڭكەدە كوكونىستەر مەن جەمىستەر، جۇمىرتقا، بال، ەت جانە ءسۇت ونىمدەرى ساتىلدى. سونداي-اق، جارمەڭكەدە جۇمىرتقانى 23 تەڭگەدەن، كارتوپتى 90 تەڭگەدەن، پيازدى 70 تەڭگەدەن الۋ مۇمكىندىگى بولدى. شاراعا 27 جەرگىلىكتى اۋىلشارۋاشىلىق تاۋار وندىرۋشىلەرى قاتىستى.

– بارلىعى 52 توننا كوكونىس، 600 كەلى شوشقا ەتى مەن تاۋىق ەتى، 1 توننا ءسۇت جانە 50 كەلى شۇجىق ونىمدەرى ۇسىنىلدى. كوكونىستەر مەن جەمىستەر سۇرانىسقا يە بولدى، – دەيدى اتىراۋ قالالىق كاسىپكەرلىك جانە تۋريزم ءبولىمىنىڭ باسشىسى رۋسلان داۋلەتوۆ.