بۇگىن، 3 قىركۇيەكتە جاڭاوزەندە بەس جۇزگە جۋىق قالا تۇرعىنى الاڭعا شىقتى دەپ جازادى Qamshy.kz اقپارات اگەنتتىگى. بۇل تۋرالى Tengrinews.kz حابارلادى. سايتتىڭ جازۋىنشا، نارازى حالىقپەن سويلەسۋگە ماڭعىستاۋ وبلىسىنىڭ اكىمى سەرىكباي تۇرىموۆ كەلگەن.
تۇرىموۆ جينالعانداردىڭ تالاپتارىن تىڭداپ، تۇرعىنداردى تولعاندىرعان ماسەلەلەر بويىنشا جەكە قابىلداۋعا شاقىردى. ول سونداي-اق، جينالعاندارعا قازاقستان جەرىندە جۇڭگو كاسىپورىندارى مەن زاۋىتتارى سالىنبايتىنىن ايتقان.
نارازىلار وزدەرىمەن سويلەسۋگە "پرەزيدەنت قاسىم-جومارت توقايەۆ كەلسىن" دەگەن تالاپ قويىپ جاتىر.
كەشە، 2 قىركۇيەكتە جاڭاوزەندە 100-گە جۋىق ادام بيلىكتىڭ "قازاقستان جەرىندە قىتايمەن بىرىگىپ 55 زاۋىت سالۋ" تۋرالى شەشىمىنە قارسىلىق ءبىلدىرىپ اكىمدىك ماڭىنا جينالعان. ول ەل پرەزيدەنتى قاسىم-جومارت توقايەۆتان 11-12 قىركۇيەكتە قىتايعا جوسپارلانعان رەسمي ساپارىنان باس تارتۋدى تالاپ ەتتى.
30 تامىزدا نۇر-سۇلتاندا دا بەلسەندىلەردىڭ "جۇڭگو ەكسپانسياسى مەن 51 زاۋىتىن سالۋعا قارسى حالىق قۇرىلتايى" دەپ اتالعان جيىن وتكەن.
2019 جىلدىڭ 19 ناۋرىزىنا دەيىن قازاقستاندى 30 جىلعا جۋىق ۇزدىكسىز بيلەگەن نۇرسۇلتان نازاربايەۆ 2019 جىلى ساۋىردە جۇڭگو باسىلىمدارىنا بەرگەن سۇحباتىندا قىتايدىڭ قازاقستانداعى 55 ءىرى جوباسىنىڭ 15ء-ى جۇمىسىن باستاعانىن، 11 نىسان بيىل پايدالانۋعا بەرىلەتىنىن ايتقان.
پىكىر قالدىرۋ