حالىق اراسىندا وتەگەن باتىرعا قاتىستى ءتۇرلى اڭىزدار بار. ونىڭ بىرىندە باتىردىڭ قوس ءمۇيىزى بار نىشاندى ەكەنى ايتىلسا، ەندى بىرىندە ونىڭ ولەر الدىندا سۇيەگىن نارعا تيەۋ جونىندەگى اماناتى ايتىلادى. قاپشاعاي سۋ قويماسى سالىنادى دەپ باتىر سۇيەگىنىڭ 200 جىلدان سوڭ قازىلىپ الۋى دا ءوز الدىنا بولەك اڭگىمە. ءقازىر وتەگەن باتىر كەسەنەسى قورداي اۋدانىنداعى وتەگەن اۋىلى ماڭىندا ورنالاسقان. كەسەنە 2010 جىلى جەرگىلىكتى ماڭىزى بار مەملەكەتتىك تاريح جانە مادەنيەت ەسكەرتكىشتەرىنىڭ تىزىمىنە الىنسا، 2017 جىلى «قازاقستاننىڭ كيەلى جەرلەرىنىڭ گەوگرافياسى» جوباسى اياسىندا قازاقستاننىڭ وڭىرلىك قاسيەتتى نىساندار تىزىمىنە كىرگىزىلگەن، دەپ جازادى Qamshy.kz اقپارات اگەنتتىگى. 

وتەگەن وتەعۇل ۇلى 1699 جىلى شۋ القابىنداعى حان تاۋىنىڭ وڭتۇستىك شىعىسىنداعى يزەندى دەگەن جەردە تۋعان. ونىڭ اكەسى وتەعۇل دا قالماقتاردىڭ شابۋىلىنا قارسى كۇرەسكەن. ال باتىر بويىنداعى شەشەندىك پەن ادىلدىك تولە بي اۋليەدەن سىڭىرگەن ۇقسايدى. وعان قوسا ساۋەگەيلىك پەن كورىپكەلدىك تە باتىر بەينەسىن اسقاق ەتە تۇسەدى.

وتەگەن باتىردىڭ كەسكىن كەلبەتى دە، حالىق جادىندا ەرەكشە جاقسى ساقتالعان. ول كەڭ جاۋىرىندى، يىقتى، تىك قاباقتى، قىر مۇرىندى، ءور تۇلعالى وتكىر، وجەت ادام بولعان. داستان – جىرلاردا، اڭىز اڭگىمەلەردە ونىڭ ايقاسقان قوس ءمۇيىزى بار ەكەندىگى دە ايتىلادى. بۇل قوس ءمۇيىز وتەگەن باتىردىڭ باسىنا كيىلگەن تاقيانى كوتەرىپ تۇرادى. باتىردىڭ بۇل تاڭباسى بورىك كيسە عانا كورىنبەيدى ەكەن. ءوز زامانىندا داۋدى شەشىپ، قالىڭ جاۋدىڭ بەتىن قايتارعان باتىر قارتايىپ، دۇنيە سالارىندا: «مەن ولگەن سوڭ سۇيەگىمدى اق نارعا تيەپ جىبەرىڭدەر، ول قاي جەرگە شوكسە، سول جەرگە جەرلەڭدەر» – دەپ امانات قالدىرعان كورىنەدى. ونىڭ اماناتى ساي باتىر سۇيەگىن ارتىلعان اق نار شولاق تاۋىنىڭ ىلە بويىنداعى شەڭگەلدى دەگەن جەرگە بارىپ شوگىپتى. بۇل ماڭ قازىرگى قاپشاعاي سۋ قويماسىنىڭ ورنى بولعانعا ۇقسايدى. 1973 جىلى مۇندا قاپشاعاي سۋ ەلەكتر ستانسياسىن سالاناتىنىن بىلگەن باتىر ۇرپاقتارى ونىڭ سۇيەگىن قازىرگى قورداي اۋدانىنداعى وتەگەن اۋىلىنىڭ ماڭىنا اكەپ جەرلەيدى. ال باتىردىڭ تۋىلعانىنا 300 جىل تولۋ مەرەيتويىندا 1999 جىل ءدال وسى بيىك ءدوڭ باسىنا جاڭا كەسەنە تۇرعىزىلعان.

تىك ءتورتبۇرىشتى كەسەنە تۇتاس تەمىر-بەتوننان قۇيىلعان. سىرتى اق مارمارمەن قاپتالعان. نىساننىڭ نەگىزى قاسبەتى مەن ۇشكىر پورتال جانە كىرەبەرىسىندە قۋىس ءدالىزى بار. قۇرىلىستىڭ اۆتورلارى جانە ساۋلەتشىلەرى س. دەمباي جانە ن. باەكەيەۆ بولىپ تابىلادى.