5 قىركۇيەكتە الماتىداعى "استانا" الاڭىندا 40-قا جۋىق ازامات جينالىپ،  "جۇڭگو ەكسپانسياسىنا جول جوق!"، "ساياسي تۇتقىندارعا بوستاندىق!" دەگەن نارازىلىق شاراسىن وتكىزدى دەپ جازادى Qamshy.kz اقپارات اگەنتتىگى.

كەشكى ساعات 6-دان باستاپ الاڭعا جينالعان نارازىلار 3 قىركۇيەكتەن بەرى "قازاقستاندا جۇڭگو ىقپالىنىڭ كۇشەيگەنىن" ايتىپ، نارازىلىق ءبىلدىرىپ جاتقان جاڭاوزەندىكتەردى قولدايتىندارىن ايتتى. سونىمەن قاتار نارازىلار قازاقستاندى 30 جىلعا جۋىق ۇزدىكسىز بيلەگەن نازاربايەۆتىڭ ساياساتىن سىنعا الىپ، ونىڭ "بيلىكتەن تۇبەگەيلى كەتۋىن" تالاپ ەتتى.

جيىنىندا ءسوز سويلەگەن بەلسەندى بەسجان تولەۋبەك ۇلى الماتىدا كەشەدەن بەرى ءوتىپ جاتقان "جۇڭگو ەكسپانسياسىنا جول جوق" دەگەن نارازىلىق شاراسىنا قاتىسىپ جاتقاندار "ەشقانداي بۇلىكشىلەر ەمەس" ەكەنىن،ولاردى "الاڭعا جينالۋعا ەشكىم ۇگىتتەمەگەنىن" ايتتى. سونىمەن قاتار تولەۋبەك ۇلى:  "دەموكتاريالىق مەملەكەتتە ساياسي تۇتقىندار دەگەن بولمايدى، سوندىقتان قاماۋداعى ساياسي تۇتقىنداردىڭ بارلىعى بوساتىلسىن. ءاربىر ادامدى جەكە-جەكە اتاپ ەمەس، تۇگەلدەي بوساتسىن. سول كەزدە عانا ءبىز دەمەكراتيالىق ەل ەكەندىگىمىزگە سەنەمىز. قاعاز جۇزىندە ەمەس، ءىس جۇزىندە. بىزدە ءقازىر دەموكراتيا دەگەن ءسوز بار، وكىنشىكە قاراي دەموكراتيا دەگەن ۇعىم جوق"، دەدى.

الاڭعا جينالعاندارمەن سويلەسۋگە جەرگىلىكتى بيلىك وكىلدەرىنەن ەشكىم كەلگەن جوق. تەك نارازىلاردى سىرتىنان سۋرەتكە ءتۇسىرىپ جۇرگەن ادامدار بولدى. جينالعاندار ولاردىڭ "بيلىك تاپسىرماسىن ورىنداپ جۇرگەن ادامدار" ەكەنىن ايتتى. 

بۇعان دەيىن 4 قىركۇيەكتە الماتى قالالىق اكىمدىگى عيماراتىنىڭ الدىنا 50-دەن اسا ازامات جينالىپ، سەگىز ساعات بويى نارازىلىق شارالارىن وتكىزدى. ولار ول كەزدە دە "جۇڭگو ەكسپانسياسىنا جول جوق!"، "ساياسي تۇتقىندارعا بوستاندىق بەرىلسىن!" دەگەن ەكى نەگىزگى تالاپتارىن ايتتى. نارازىلارمەن سويلەسۋگە الماتى قالاسى اكىمىنىڭ ورىنباسارى ساپاربەك تۇياقبايەۆ شىعىپ، ولارعا "بۇل جينالعاندارى زاڭسىز" ەكەنىن ەسكەرتىپ، "تاراپ كەتۋدى" تالاپ ەتتى. نارازىلار اكىمدىك عيماراتى ورنالاسقان "جەلتوقسان" كوشەسىمەن "استانا" الاڭىنا دەيىن شەرۋلەتىپ بارىپ، كەيىن تارادى. 

3 قىركۇيەكتە ماڭعىستاۋ وبلىسىن جاڭاوزەن قالاسىنىڭ ەكى جۇزدەن استام تۇرعىنى قالانىڭ ورتالىق الاڭىنا جينالىپ، قىتايدىڭ قازاقستانداعى جوبالارىن توقتاتۋدى تالاپ ەتكەن ەدى. سودان كەيىن 4 قىركۇيەكتە نۇر-سۇلتان، اقتوبە جانە شىمكەنتتە دە بەلسەندىلەر "جۇڭگو ەكسپانسياسىنا قارسى" اكسيا وتكىزگەن.