يندۋستريا جانە ينفراقۇرىلىمدىق دامۋ مينيسترلىگى الماتى وبلىسىنداعى توتەنشە جاعداي بويىنشا ارنايى كوميسسيا قۇردى دەپ حابارلايدى Qamshy.kz اقپارات اگەنتتىگى.

مينيسترلىك باسپا ءسوز قىزمەتىنىڭ حابارلاۋىنشا، 15 قىركۇيەكتە ساعات 19:08-دە اقسەڭگىر-شامالعان تەمىرجول وتكەلىنىڭ الماتى-وتار ۋچاسكەسىندە №43 الماتى-قوستاناي جولاۋشىلار پويىزى مەن Setra ماركالى №456 الماتى-قاسكەلەڭ جولاۋشىلار اۆتوبۋسى كۇزەتىلەتىن وتكەلدە سوقتىعىسقان. 

"كوميسسيا قۇرامىنا كولىك كوميتەتى مەن "قازاقستان تەمىر جولى" ۇلتتىق كومپانياسىنىڭ وكىلدەرى كىرەدى. كوميسسيا مۇشەلەرى وقيعا ورنىنا جول تارتتى"، - دەپ حابارلادى مينيسترلىكتىڭ باسپا ءسوز قىزمەتى.  الماتى وبلىسىندا اۆتوبۋستى پويىز سوعىپ ءوتتى.

ەسكە سالايىق، "ەكاتەرينبۋرگ-الماتى" تاسجولىنىڭ 2449-شاقىرىمىندا شامالعان ستانسياسىندا 15 قىركۇيەكتە ساعات شامامەن 19.20-دا بولعان. اۆتوبۋس جۇرگىزۋشىسى دابىلعا قاراماستان تەمىرجولعا ءوتىپ كەتكەن. ناتيجەسىندە اۆتوبۋس پويىزبەن سوقتىعىسقان. الدىن الا مالىمەت بويىنشا اپات سالدارىنان 2 ادام قازا تاۋىپ، 9 ادام زارداپ شەكتى دەلىنگەن. الايدا، وقيعانى تەكسەرۋ بارىسىندا اپات سالدارىنان اۆتوبۋس جۇرگىزۋشىسى قازا تاۋىپ، ءۇش ادام جانساقتاۋ بولىمىندە جاتقانى انىقتالدى.

قازاقستان پرەزيدەنتى قاسىم-جومارت توقايەۆ قازا تاپقان ادامنىڭ تۋىستارىنا كوڭىل ايتتى.

كۋاگەرلەردىڭ ايتۋىنشا، اۆتوبۋس تەمىرجول وتكەلىندە جول كولىك كەپتەلىسىندە تۇرىپ قالعان. سول ساتتە پويىز جوعارى جىلدامدىقتا جۇيتكىپ كەلە جاتقان. پويىزدىڭ دابىل بەلگىسىن ەستىگەن اۆتوبۋس جۇرگىزۋشىسى ابدىراپ، الدىڭعى ەسىكتى اشا الماعان. تەك ارتقى ەسىكتى اشىپ، جولاۋشىلاردى ءتۇسىرىپ، ءوزى شىعىپ ۇلگەرمەي قالعان.

"مەن ءبىر بالانى شىعارىپ ۇلگەردىم. اۆتوبۋستان قاشا جونەلدىم دە پويىزدىڭ اۆتوبۋستى سوققانىن كوردىم. جۇرگىزۋشى كوز الدىمدا ۇشىپ كەتتى"، - دەيدى كۋاگەرلەردىڭ ءبىرى. 

جەرگىلىكتى تۇرعىنداردىڭ ايتۋىنشا، جۇرگىزۋشىنىڭ جارى سول اۆتوبۋستا كوندۋكتور بولعان، ولار بىرگە جۇمىس ىستەگەن ەكەن. قايتىس بولعان ەر ادامنىڭ ارتىندا ءتورت بالاسى قالعان.   

الماتى وبلىسىنداعى توتەنشە جاعدايدى پروكۋراتۋرا باقىلاۋعا الدى.

الماتى وبلىستىق توتەنشە جاعداي دەپارتامەنتى جەدەل شتاب قۇردى.

مىنا تەلەفوندار بويىنشا جەدەل جەلى اشىلدى:

(87282) 220213، 220018.

سونداي-اق، الماتى قالالىق تجد مىنا تەلەفوندار بويىنشا جەدەل جەلى اشتى: (87282) 220213، 220018