قىركۇيەكتىڭ 16-سىنا قاراعان ءتۇنى شامالعان ستانسياسىنا ونداعان ادام جينالىپ، جەرگىلىكتى بيلىكتەن اۆتوبۋس پەن پويىز جولى تۇيىسكەن تۇسقا كوپىر سالۋدى تالاپ ەتتى دەپ حابارلايدى Qamshy.kz اقپارات اگەنتتىگى ازاتتىق راديوسىنا سىلتەمە جاساپ. 

وقيعا ورنىندا بولعان ازاتتىق ءتىلشىسىنىڭ حابارلاۋىنشا، تۇرعىندار "مۇنداي وقيعا ءبىرىنشى رەت بولىپ وتىرعان جوق، كوپىرگە بولىنگەن اقشا جەلىنىپ قويدى" دەپ اشۋلانىپ، "كوپىر! كوپىر!" دەپ ايعايلادى.

- 11 جىلدان بەرى ىلعي كورەتىنىمىز وسى. ازاندا دا سول، كەشكە دە سول. جۇمىسقا باراردا، جۇمىستان قايتاردا ەكى-ۇش ساعاتتاپ تۇرامىز. "كوپىر كارتادا بار" دەپ ايتادى. ۇزاق جولعا جۇرەتىن جۇرگىزۋشىلەر كارتادان كورەدى دە وسىندا كەلەدى، ءبىراق كوپىر جوق. ەگەر كەلىسپەسە، كۇن سايىن كەشكى 17.00 مەن 21.00 اراسىندا پويىزدى توقتاتسىن. ءبىز ۇيىمىزگە ءوتىپ الايىق. ودان كەيىن جۇرگىزە بەرسىن. كۇن سايىن ءجۇز پويىز وتەدى. قانشاما ادام ءولىپ جاتىر. ەگەر بۇگىن دەمالىس بولماي، ساباق بولعاندا نە بولار ەدى؟ ساياجايدان اۆتوبۋس-اۆتوبۋس وقۋشى كەلەدى. بۇلار سولاردىڭ ءولىمىن كۇتىپ وتىر ما؟ جۇرگىزۋشى كىنالى دەيدى. ول قايدان كىنالى بولسىن؟ ارتىندا دا، الدىندا دا كولىك بولدى. وزدەرىڭىز كوردىڭىزدەر. كوپىر سالىپ بەرسىن! -دەدى ەسىمىن بولات بوكەبايەۆ دەپ تانىستىرعان شامالعان تۇرعىنى.

جانىنداعى تۇرعىندار ونى قوستادى. "كوپىر ماسەلەسىن ايتقانىمىزعا قانشا جىل بولدى. بالالاردى دا باسىپ كەتىپ جاتىر" دەدى تۇرعىنداردىڭ ءبىرى. "كوپىر سالامىز دەپ جۇرگەندەرىنە جەتى جىل بولدى. 2017 جىلى پايدالانۋعا بەرىلەدى دەدى. سول كوپىر قايدا؟" دەپ ايعايلادى نارازى ازاماتتاردىڭ ءبىرى.

الماتى وبلىسى قاراساي اۋدانىنىڭ اكىمى جانداربەك دالابايەۆ "كوپىرگە اقشا بولىنگەنبەگەنىن، تەك سحەماسى عانا جاسالعانىن"، ءوزىنىڭ بۇل قىزمەتكە ءبىر جىل بۇرىن عانا كەلگەنىن ايتىپ، تۇرعىنداردى سابىرعا شاقىردى. "سەيسەنبى كۇنى تاڭەرتەڭ كەلىڭىزدەر، ماسەلەنى تالقىلايىق" دەگەن ۇسىنىس ايتتى ول. اقىرىندا تۇرعىندار مەن بيلىك قىركۇيەكتىڭ 17ء-سى كۇنى تاڭەرتەڭ اۋداندىق اكىمدىك الدىندا كەزدەسەتىن بولىپ كەلىسىپ، تاراستى.

جول اپاتى جايلى العاش حابارلامالار پايدا بولعان كەزدە رەسمي ورىندار اپاتتان زارداپ شەككەندەر تۋرالى قاراما-قايشى اقپارات تاراتتى.

اۋەل باستا الماتى وبلىستىق اكىمدىگىنىڭ باسپا ءسوز قىزمەتى "اپاتتان ەكى ادام قازا تاپتى، 9 ادام زارداپ شەكتى" دەپ حابارلادى. ىزىنشە بۇل اقپاراتتى جوققا شىعاردى. ونىڭ سەبەبىن الماتى وبلىستىق اكىمدىگىنىڭ باسپا ءسوز حاتشىسى عالىمۇرات جۇكەل بىلاي دەپ ءتۇسىندىردى:

- ەكى كولىك ەكى ادامنىڭ ءمايىتىن اكەلدى. ءبارى جول اپاتىنان قايتىس بولدى دەگەن. ونىڭ بىرەۋىن مۇلدە باسقا جول كولىك وقيعاسىنان جەتكىزگەن بولىپ شىقتى. ەكىنشىسى - شامالعانداعى اپاتتا قازا بولعان اۆتوبۋس جۇرگىزۋشىسى. ال "9 ادام زارداپ شەككەن" دەگەنگە كەلسەك، اۋەل باستا 9 ادامعا مەديسينالىق كومەك كورسەتىلەدى دەگەن. ءبىراق ناقتى ۇشەۋى عانا ءقازىر اۋرۋحانادا جاتىر.

بۇعان قوسا، سوعىلعان اۆتوبۋستاعى جولاۋشىلار سانىنا بايلانىستى دا قاراما-قايشى دەرەك بولدى. وبلىستىق توتەنشە جاعداي دەپارتامەنتى ازاتتىق تىلشىسىنە اۆتوبۋستا 45 ادام بولعانىن ايتتى. ال پرەزيدەنت قاسىم-جومارت توقايەۆ Twitter-دەگى پاراقشاسىندا اۆتوبۋستا 67 ادام بولعان دەپ جازدى.