2020 جىلى ۇلى اقىن اباي قۇنانباي ۇلىنىڭ 175 جىلدىعىن اتاپ ءوتۋ جايلى جارلىققا پرەزيدەنت قاسىم-جومارت توقايەۆ قول قويعان بولاتىن. جارلىقتا 2019 جىلعى 1 شىلدەگە دەيىن 2020 جىلى قازاق حالقىنىڭ ۇلى اقىنى، اعارتۋشىسى اباي قۇنانباي ۇلىنىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيا قۇرىلۋ قاجەتتىگى، 2019 جىلعى 1 قازانعا دەيىن اباي قۇنانباي ۇلىنىڭ 175 جىلدىق مەرەيتويىن دايىنداۋ جانە وتكىزۋ جونىندەگى جالپىرەسپۋبليكالىق جوسپارى بەكىتىلۋى ءتيىس ەكەندىگى ايتىلادى.

ەل بولىپ ۇلى اقىن ولەڭدەرىن جارىسا جاتتاپ، الەمدىك دەڭگەيدە اباي ولەڭدەرىن وقۋ ارقىلى ەستافەتا دا وتكىزىپ جاتىرمىز. الايدا وسكەمەن قالاسىنىڭ تۇرعىندارى  رەسپۋبليكا الاڭىنداعى اباي قۇنانباي ۇلىنىڭ قارا سوزدەرى جازىلعان تاقتالار، اباي داڭعىلىنىڭ بويىنداعى ءبىرىنشى ءۇيدىڭ قابىرعاسىنا ىلىنگەن ەسكەرتكىش تاستاقتانىڭ دا ابدەن توزىعى جەتىپ تۇرعانىن ustinka.kz سايتىندا مالىمدەدى.

– جولدىڭ قارسى بەتىندە اۆتوبەكەت جانە ءبىرىنشى ءۇيدىڭ جانىندا ساۋدا ءۇيى مەن بازار ورنالاسقان. وسكەمەنگە كەلەتىن جولاۋشىلار وسىنداي حالىق كوپ جۇرەتىن كوشە بويىنداعى ەسكەرتكىش تاقتانى كورىپ، حاكىم ابايعا قانداي قۇرمەت كورسەتىپ جاتقاندىعىمىزدى ىشتەي باعامداعان بولار، – دەيدى تاكسي جۇرگىزۋشىسى سەرىك بازىكەن ۇلى.

– كەتىلگەن تاستاقتانىڭ بەتىنە جازىلعان ۇلى اقىن ەسىمى وشۋگە جاقىن، بەينە قازىرگى سانامىزدىڭ ءالى رۋحاني جاڭعىرا الماعاندىعىنىڭ بەلگىسىندەي، – دەيدى قالا تۇرعىنى سىمبات ديدار ۇلى.