مەملەكەت باسشىسى قاسىم-جومارت توقايەۆتىڭ امەريكا قۇراما شتاتتارىنا جۇمىس ساپارى باستالدى. پرەزيدەنت نيۋ-يوركتە 23-25 قىركۇيەك ارالىعىندا وتەتىن بىرىككەن ۇلتتار ۇيىمى باس اسسامبلەياسىنىڭ 74-سەسسياسىنا قاتىسادى، دەپ حابارلايدى Qamshy.kz اقپارات اگەنتتىگى.

نۇر-سۇلتاننان ۇشىپ شىققان ءنومىرى ءبىرىنشى بورت الەمدەگى قارجى جانە ساياسي ورتالىقتاردىڭ ءبىرى نيۋ-يورككە كەستەدەن كەشىكپەي قوندى، دەپ جازادى 24.kz. ساپار 5 كۇنگە جالعاسادى دەپ جوسپارلانىپ وتىر. ونىڭ اياسىندا كوپتەگەن شەت مەملەكەتتەردىڭ باسشىلارىمەن ەكى جاقتى كەزدەسۋلەر وتەدى. العاشقىلارى ەلوردا ۋاقىتى بويىنشا بۇگىن كەشكى ساعات 11-دە باستالادى.

ق ر پرەزيدەنتىنىڭ باسپا ءسوز حاتشىسى بەرىك ءۋاليدىڭ حابارلاۋىنشا، باس اسسامبلەيانىڭ جۇمىسىنا 196 دەلەگاسيا، 100-گە جۋىق مەملەكەت باسشىلارى، بۇۇ-عا مۇشە ەلدەردىڭ 80-نەن استام ۇكىمەت جانە سىرتقى ساياسات ۆەدومستۆولارىنىڭ جەتەكشىلەرى قاتىسادى.

"وسى ماڭىزدى شارانىڭ اياسىندا 630 ءتۇرلى كەزدەسۋلەر وتەدى دەپ جوسپارلانۋدا. مەملەكەت باسشىسى باس اسسامبلەيانىڭ جالپى پىكىرسايىسىندا بايانداما جاسايدى. بيىل اتالعان پىكىرسايىس "كەدەيلىكتى جويۋ، ساپالى ءبىلىم بەرۋدى جانە كليماتتى ساقتاۋ ءىس-قيمىلدارى مەن جان-جاقتى تاسىلدەردى ىلگەرىلەتۋ ءۇشىن كوپ جاقتى كۇش-جىگەردى شوعىرلاندىرۋ" تاقىرىبىندا وتەدى"، – دەپ جازادى بەرىك ءۋالي عacebook پاراقشاسىندا.

"پرەزيدەنت تۇراقتى دامۋ ماسەلەلەرى جونىندەگى جوعارى دەڭگەيدەگى ساياسي فورۋمدا ءسوز سويلەيدى. بۇدان بولەك قاسىم-جومارت توقايەۆتىڭ بۇۇ-نىڭ باس حاتشىسى انتونيۋ گۋتەرريشپەن، ءبىرقاتار مەملەكەت جانە ۇكىمەت باسشىلارىمەن، حالىقارالىق ۇيىم جەتەكشىلەرىمەن، امەريكالىق بيزنەس جانە ترانسۇلتتىق كومپانيا وكىلدەرىمەن، اقش-تىڭ ساياسي جانە ساراپشى توپ مۇشەلەرىمەن كەزدەسۋى جوسپارلانعان. قازاقستان پرەزيدەنتىنىڭ بۇۇ با-نىڭ جوعارى دەڭگەيدەگى جيىنىنا قاتىسۋى ەلىمىزدىڭ ءبىرقاتار سىرتقى ساياسي باستامالارىن ىلگەرىلەتۋگە باعىتتالعان. اتاپ ايتقاندا، قارۋسىزداندىرۋ جانە ونى تاراتپاۋ، بىتىمگەرشىلىك، تەرروريزمگە قارسى ارەكەت ەتۋ ۇستانىمدارى تالقىلانادى. سونىمەن بىرگە كەڭ اۋقىمدى حالىقارالىق اۋديتوريانىڭ نازارىنا ورنىقتى دامۋ، ازىق-تۇلىك قاۋىپسىزدىگى، دەنساۋلىق ساقتاۋ جانە ءبىلىم بەرۋ جۇيەسىمەن جاپپاي قامتۋ، قورشاعان ورتانىڭ ازىپ-توزۋى سىندى جاھاندىق كۇن تارتىبىندەگى وزەكتى ماسەلەلەرگە قاتىستى قازاقستاننىڭ كوزقاراسى ۇسىنىلادى"، – دەدى ق ر پرەزيدەنتىنىڭ باسپا ءسوز حاتشىسى.

ايتا كەتەيىك، پرەزيدەنتتىڭ اقش-قا كەلۋى قارساڭىندا امەريكالىق بەدەلدى باسىلىم "The Hill" گازەتىندە ونىڭ ماقالاسى جارىق كوردى. ماقالادا ەلىمىزدىڭ ەكونوميكا مەن ساياساتتاعى باسىم باعىتتارى ءتۇسىندىرىلىپ، وسى ساپاردىڭ ماڭىزدىلىعى باياندالعان.