اۋدانداعى ءورت شارپىعان بەس اۋىلدىق وكرۋگتىڭ ۇشەۋىندە ءورت تولىقتاي ءسوندىرىلدى. جاپا شەككەندەر مەن جاراقاتتانعاندار جوق، دەپ حابارلايدى Qamshy.kz اقپارات اگەنتتىگى پاۆلودار وبلىسى اكىمىنىڭ باسپا ءسوز قىزمەتى تاراتقان دەرەكتى نەگىزگە الا وتارىپ.

پاۆلودار وبلىسى اكىمىنىڭ تاپسىرماسى بويىنشا قۇرىلعان شتاب قىزمەتكەرلەرى ءورت ءسوندىرۋ جۇمىستارىنىڭ ناتيجەلەرى تۋرالى ايتىپ بەردى.

قىزىل وت شارپىعان ءۇش اۋىلدىق وكرۋگتە ءورت تولىق ءسوندىرىلدى، تاعى دا ەكى اۋىلدا ءورتتىڭ بەتى قايتارىلدى. سونىمەن قاتار، باياناۋىل ۇلتتىق تابيعي پاركىنىڭ تاۋ بوكتەرلەرىندەگى ءورتتى ءسوندىرۋ جۇمىستارى دا ءجۇرىپ جاتىر.

 – بۇل ورمان-دالا ءورتىنىڭ پايدا بولۋىنا جانە سوندىرۋشىلەرگە بوي الدىرماۋىنا وتكەن كۇندەرى اۋداندا اۋا تەمپەراتۋراسىنىڭ جوعارى بولۋى جانە جىلدامدىعى سەكۋندىنا 20-24 مەترگە دەيىن جەتكەن جەلدىڭ كۇشەيۋىنە بايلانىستى بولدى، – دەدى وڭىرلىك تج دەپارتامەنتىنىڭ باستىعى ەرنۇر وتەگەنوۆ. – كەشەدەن بەرى ءورتتى سوندىرۋگە 120 بىرلىك تەحنيكا مەن دەپارتامەنتتىڭ جەكە قۇرامى، ۇلتتىق پارك قىزمەتكەرلەرى، ەرىكتى ءورت ءسوندىرۋ قۇرىلىمدارىنىڭ وكىلدەرى، بارلىعى  500 ادام جۇمىلدىرىلدى.

تاڭەرتەڭ ءورت سوندىرۋگە مي-8 تىكۇشاعى دا كىرىسەدى. ءۇش توننالىق سيستەرنانى كوتەرىپ ۇشاتىن اۋە تەحنيكاسىنىڭ كومەگىمەن جول ءۇستى تەحنيكاسى جەتە المايتىن اۋماقتارداعى ءورت سوندىرىلەدى.