الداعى اپتادا جۇڭگو قازاقستانمەن اراداعى شەكارادا ورنالاسقان وتكىزۋ بەكەتتەرىن ءۇش كۇنگە جاۋىپ تاستايدى. اقپاراتتى ۇلتتىق قاۋىپسىزدىك كوميتەتى راستادى دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ.

1 قازاندا جۇڭگو حالىق رەسپۋبليكاسىنىڭ قۇرىلعان كۇنى اتالىپ وتەدى. وسى مەملەكەتتىك مەيرامعا بايلانىستى 1-3 قازان كۇندەرى قازاقستان–جۇڭگو مەملەكەتتىك شەكاراداعى وتكىزۋ بەكەتتەرى جابىق بولادى. اۋە جانە تەمىرجول قاتىناسى جابىلمايدى. ال 4 قازاندا ادامدار مەن جۇكتەردى وتكىزۋ جۇمىسى قايتا باستالادى. 

قحر-دىڭ قۇرىلعان كۇنى – وسى ەلدىڭ نەگىزگى مەملەكەتتىك مەيرامى. مەرەكە جىل سايىن اتالىپ وتەدى. 1949 جىلى بەيجىڭ قالاسىنداعى تيانانمەن الاڭىندا جۇڭگو حالىق رەسپۋبليكاسىنىڭ قۇرىلعانى تۋرالى مالىمدەمە جاسالدى. باس كەزىندە وسى مەيرامدا جىل سايىن اسكەري شەرۋلەر ۇيىمداستىرىلدى. مادەني ريەۆوليۋسيانىڭ ناتيجەسىندە مۇنداي شارالار توقتاتىلعان بولاتىن. دەگەنمەن، 1984 جىلى قايتادان قولعا الىندى. 2009 جىلى وتكەن سوڭعى اسكەري شەرۋدە جۇڭگو اسكەري تەحنيكانىڭ سوڭعى ۇلگىلەرىن كورسەتتى.

قىتايدا بۇل مەيرام كەزىندە ءبىر اپتا بويى دەمالىس بولادى. قالا كوشەلەرىندە گۇلدەن سان الۋان كومپوزيسيالار جاسالىپ، مەرەكەلىك شارالار مەن وت-شاشۋ بولادى.

ايتا كەتەيىك، بيىل جۇڭگو وسىمەن ەكىنشى رەت شەكارا بەكەتتەرىن جاۋىپ وتىر. سوڭعى رەت مۇنداي شارا 1-5 مامىر ارالىعىندا بولعان ەدى. ول كەزدە كوكتەم مەن ەڭبەك مەيرامى تويلاندى.