قازاقستاننىڭ قازىرگى پرەزيدەنتى قاسىم-جومارت توقايەۆتىڭ وتىز جىل بۇرىن جۇڭگو مەن كسرو اراسىنداعى سالقىندىقتى جويىپ، تاراپتاردىڭ تابىسۋىنا سەپتىگىن تيگىزگەن ەكەن دەپ جازادى Qamshy.kz اقپارات اگەنتتىگى Sputnik قازاقستانعا سىلتەمە جاساپ.
بۇل تۋرالى بەلگىلى رەسەيلىك ديلومات ەۆگەنيي باجانوۆ ايتىپ بەردى.
ديپلوماتتىڭ ايتۋىنشا، 1989 جىلدىڭ ماۋسىمىندا باس حاتشى ميحايل گورباچيەۆ جۇڭگو مەن كسرو اراسىنداعى قارىم-قاتىناستى جولعا قويۋ ءۇشىن بەيجىڭگە جول تارتادى. توقايەۆتىڭ جۇڭگو ءتىلىن جاقسى مەڭگەرگەنى سونشالىق، گورباچيەۆتىڭ اۋدارماشىلارىنىڭ اراسىندا ول دا بولعان.
"ءبىزدىڭ ارامىزدا بىرنەشە ونداعان جىل بويى تەكەتىرەس بولدى. سوندىقتان تاراپتاردىڭ تاتۋلاسۋى ءار اۋدارىلعان سوزگە بايلانىستى ەدى. اقىرى وعان دا قول جەتكىزدىك، توقايەۆ ءوز مىندەتىن ابىرويمەن ورىنداپ شىقتى"، - دەپ ەسكە الدى باجانوۆ.
ەۆگەنيي باجانوۆ پەن قاسىم-جومارت توقايەۆ قىرىق جىلداي دوس. رەسەيلىك ديپلومات سىرتقى ساياساتتا توقايەۆتاي ءبىلىمى مەن تاجىريبەسى مول باسقا ادامدى تانىمايتىنىن ايتادى.
بۇدان بولەك، ول توقايەۆقا مانساپ جولىندا ىلگەرىلەۋگە جۇڭگو ءتىلى قالاي كومەكتەسكەنىن اڭگىمەلەپ بەردى.
كەڭەس وداعى ىدىراعاننان كەيىن قازاقستاننىڭ سول كەزدەگى پرەمەر-مينيسترى سەرگەي تەرەششەنكو قىتايعا رەسمي ساپارمەن بارماقشى بولىپ، اۋدارماشى ىزدەگەن ەكەن. سول كەزدە قاسىم-جومارت توقايەۆ اۋدارماشى رەتىندە ۇكىمەت باسشىسىمەن ەرىپ بارعان.
"توقايەۆ قازاقستان پرەمەرىنە ۇناپ قالدى. وسىدان كەيىن ول بىردەن سىرتقى ىستەر ءمينيسترىنىڭ ورىنباسارى بولدى. كەيىن سىرتقى ىستەر ءمينيسترى، پرەمەر-مينيستر، پارلامەنت سەناتىنىڭ ءتوراعاسى، بۇۇ-نىڭ جەنيەۆاداعى باس حاتشىسىنىڭ ورىنباسارى جانە تاعى باسقا لاۋازىمدى اتقاردى. تاڭعاجايىپ كارەرا جاسادى"، - دەپ سانامالاپ بەردى باجانوۆ.
پىكىر قالدىرۋ