ەلوردادا قازاقتىڭ ءۇش ارىسى – ساكەن سەيفۋللين، ءىلياس جانسۇگىروۆ جانە بەيىمبەت مايلينگە ەسكەرتكىشتەر قويىلادى.
بۇل تۋرالى نۇر-سۇلتان قالاسى اكىمىنىڭ ورىنباسارى باقتيار ماكەن "مەنىڭ ءتىلىم – ۇلى دالا رۋحى" ءححى قالالىق ءتىل فەستيۆالىندە ءمالىم ەتتى.
"ابايدىڭ 175 جىلدىق مەرەيتويىنا ارنالعان شارالار باستالىپ كەتتى. سونىڭ اياسىندا تۇڭعىش رەت ەلوردامىزدا №87 اباي اتىنداعى مەكتەپتى اشتىق. ءال-فارابيدىڭ 1150 جىلدىعىنا وراي، ونىڭ ەسىمىن وقۋشىلار سارايىنا بەرۋ جوسپارلانعان. بيىل حالىقارالىق دەڭگەيدەگى جازۋشىلار كونفەرەنسياسى ءوتتى. سونىڭ اياسىندا اباي داڭعىلىندا جازۋشىلار اللەياسىن سالدىق. سول اللەيادا ءۇش ارىس – ساكەن سەيفۋللين، ءىلياس جانسۇگىروۆ، بەيىمبەت ءمايليننىڭ 125 جىلدىعىنا وراي ەسكەرتكىشتەر ورناتىلادى. وزگە دە تۇلعالاردى ۇلىقتاۋ ءۇشىن ءبىلىم-عىلىم وشاقتارىنا بەلگىلى قايراتكەرلەردىڭ ەسىمىن بەرۋدى جالعاستىرامىز"، – دەدى قالا اكىمىنىڭ ورىنباسارى.
ايتا كەتەيىك، "ءتىل تۋرالى" زاڭنىڭ قابىلدانعانىنا 30 جىل تولۋىنا وراي، ەلوردادا مەملەكەتتىك ءتىلدىڭ قولدانىلۋ اياسىن كەڭەيتىپ، ونىڭ ۇلتارالىق قاتىناس قۇرالىنا اينالۋىنا سىڭىرگەن ەڭبەگى ءۇشىن ءبىر توپ ءتىل جاناشىرى ماراپاتتالدى.
ايجان سەرىكجان قىزى
پىكىر قالدىرۋ