قاراعاندىداعى بىرنەشە جولاۋشىلار اۆتوبۋسىنا بەلگىسىز ادامنىڭ وق جاۋدىرعانى تۋرالى Qamshy.kz اقپارات اگەنتتىگى استانا ارناسىنا سىلتەمە جاساپ حابارلايدى.

وسىعان دەيىن پوليسيا قىزمەتكەرلەرى مالىمدەگەندەي، وقيعا كەزىندە اۆتوبۋستاردا 200-دەن اسا جولاۋشى بولعان. بەلگىسىز جان  «45-ورام» ايالداماسىندا قوعامدىق كولىكتەردىڭ تەرەزەسىنە بىرنەشە رەت وق اتىپ، مۇنان كەيىن جاقىن جەردەگى اۋلالاردىڭ بىرىندە جاسىرىنىپتى.

№45 باعىتتاعى اۆتوبۋس جۇرگىزۋشىسى ەرمەك سىزدىقوۆتىڭ سوزىنشە، ول وق اتىلعانىن ەستىمەگەن. جۇرگىزۋشى سالوندا دۇربەلەڭ تۋىپ، ادامداردىڭ شۋلاپ كەتكەنىن عانا بايقاپتى.

«كەيبىر جولاۋشى اۆتوبۋستان شىعۋعا تىرىستى. وق اتىلعاننان ءبارى شوك بولدى. ارتىنشا №40 باعىتتاعى اۆتوبۋس كەلدى. ول جەردە ەكى پوليسەي تۇردى. سول اۆتوبۋسقا دا ەكى رەت وق تيگەن ەكەن. ال ادامدار ۇرەيلەنىپ، ەڭكەيىپ، ايالدامادان قاشتى. ءبارى قاتتى شۋلاپ، ايقايلاپ جاتتى»، – دەيدى جۇرگىزۋشى.

پوليسيا مالىمەتىنە سۇيەنسەك، وقيعا سالدارىنان ەشكىم زارداپ شەكپەگەن. ال كۋاگەرلەر جولاۋشىلاردىڭ بىرىنە دارىگەرلەردىڭ كومەگى قاجەت بولعانىن ايتادى.

قالاداعى مۇنداي جاعدايدان كەيىن ادامدار كوشەگە شىعىپ، قوعامدىق كولىككە وتىرۋعا قورقىپ قالعان.

جەرگىلىكتى تۇرعىنداردىڭ ءبىرى دينا وليمبايەۆا: «ءبىز وسى جەردە بالارىمىزمەن ۇنەمى جۇرەمىز. بۇل ادام شوشىرلىق سۇمدىق جاعداي عوي. مۇنداي جاعدايدى جايدان-جاي قالدىرۋعا بولمايدى. پوليسيا نە قاراپ وتىر؟»، – دەيدى

وقيعاعا قاتىستى قىلمىستىق كودەكستىڭ «بۇزاقىلىق» بابى بويىنشا ءىس قوزعالعان. قازىرگى ۋاقىتتا پوليسيا وق اتقان ادامنىڭ تۇلعاسىن انىقتاپ جاتىر.