پاۆلودار وبلىسىنداعى تەرەڭكول اۋىلىندا 28 جاستاعى ايەل ازاماتتىق نەكەدە تۇرعان جۇبايىن پىشاقتاعان، - دەپ حابارلايدى Qamshy.kz اقپارات اگەنتتىگى pavlodarnews.kz سايتىنىڭ دەرەگىن نەگىزگە الىپ. 

پاۆلودار وبلىستىق پوليسيا دەپارتامەنتى باسپا ءسوز قىزمەتىنىڭ مالىمەتىنشە، تەرەڭكول اۋىلىندا جۇمىسسىز ايەل ءوزىنىڭ قۇربىسىمەن ىشىمدىك ىشكەن.

"ءۇي يەسى وسى ۋاقىتتا ۇيىقتاپ جاتقان. ويانعان سوڭ 28 جاستاعى ەر ادام قۇربىسىنىڭ وتىرعانىنا نارازىلىق بىلدىرگەن. ونىڭ ۇستىنە، ايەلى جۇكتى بولعان. ەرلى-زايىپتىلار اراسىندا جانجال شىعىپ، ايەل ۇستەلدەن اس پىشاعىن الىپ، ەر ادامنىڭ كەۋدەسىنە ۇرعان. كەيىن ءوز ىس-ارەكەتىنەن قورقىپ، ۇيدەن قاشىپ كەتكەن. قۇربىسى جەدەل جاردەم شاقىرعان. ءبىراق ەر ادام كومەك كەلگەنشە قايتىس بولعان، - دەدى پد باسپا ءسوز قىزمەتىنىڭ وكىلدەرى. 

وسى دەرەككە قاتىستى ق ر قىلمىستىق كودەكسىنىڭ 99-بابى ("ادام ءولتىرۋ") بويىنشا سوتقا دەيىنگى تەرگەۋ جۇرگىزىلىپ جاتىر. كۇدىكتى ۋاقىتشا ۇستاۋ يزولياتورىنا قامالدى.