ءسوز ونەرىن كيە تۇتقان قالام يەلەرىنە قاي قوعامدا ءومىر سۇرمەسىن اينالاسىنا سەرگەك قاراۋمەن قاتار، ءومىر قۇبىلىستارىنسەزىمتالدىقپەن سۋرەتتەۋ ءتان. وتكەن ءداۋىردىڭ تىنىسىن، ناۋبەت جىلداردىڭ شەرلى شەجىرەسىن، ءوزى ءومىر ءسۇرىپ جاتقان قوعامنىڭ سان قاتپارلى قيامەتىن قاپىسىز اڭعارىپ، جۇيەلى جازىپ جۇرگەن قالامگەرلەردىڭ قاتارىندا سماعۇل ەلۋبايدى، ونىڭ قالامىنان تۋعان «اڭشى بالا»، «جارىق دۇنيە»، «اق بوز ءۇي»، «ءمىناجات»، «قيامەت - قايىم عاسىرى» ت.ب. شىعارمالارىن اتاۋعا بولادى.

ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا، ادەبيەتتانۋ جانە الەم تىلدەرى فاكۋلتەتىندە قالامگەرمەن وتكەن كەزدەسۋ كوپشىلىكتىڭ كوڭىلىنەن شىقتى دەۋگە تولىق نەگىز بار. كەزدەسۋدى اشىپ، جۇرگىزىپ وتىرعان پروفەسسور قانيپاش ءمادىبايدىڭ، جازۋشى-عالىم اسىلان جاقسىلىقتىڭ قالامگەردىڭ شىعارماشىلىعى، ءداۋىر ءۇنىن سيپاتتاۋداعى وزىنە ءتان قولتاڭباسى، فيلوسوفيالىق تەرەڭدىككە نەگىزدەلگەن قالامگەرلىك قارىم-قابىلەتى جايلى بايىپتى وي-تولعامدارى، س. ەلۋبايدىڭ قوعامنىڭ كوكەيتەستى ماسەلەلەرىن ءدوپ باسىپ، تەرەڭىنەن قوزعاعان ساليقالى اڭگىمەلەرى، قويىلعان مازمۇندى سۇراققا تولىمدى جاۋاپ ەستىگەن ستۋدەنتتەردىڭ كوڭىل اۋانى سوزىمىزگە دالەل.

كەشتى ۇيىمداستىرۋعا ۇيىتقى بولعان كۋراتور-ەدۆايزەر التىناي ءجۇسىپوۆانىڭ كۋراتورلىق توبى دايىنداعان جازۋشىنىڭ شىعارماشىلىق الەمىنەن، قالامگەرلىك قابىلەتىنەن، ازاماتتىق دۇنيەتانىمىنان سىر اڭعارتاتىن سلايدتار، بەينەروليكتەر، كىتاپ كورمەسى جيىننىڭ مازمۇنىن بايىتا تۇسكەنى انىق.

«رۋحاني دامۋدا نەگىزگى رولگە ءارقاشان ينتەلليگەنسيا يە. 2050 جىلعى قازاقستان پروگرەسسيۆتى يدەالدار قوعامى بولۋعا ءتيىس. ءبىزدىڭ قوعامىمىزدىڭ قازىرگى كوزقاراستارىنىڭ نەگىزىن ءدال وسى ينتەلليگەنسيا بەرۋى كەرەك. ينتەلليگەنسيا قالىپتاسقان مەملەكەت كەزەڭىندە جاڭا جالپىۇلتتىق قۇندىلىقتار جاساۋدا الدىڭعى قاتارلى كۇش بولۋى كەرەك. ولار زامانعا ساي جانە بولاشاققا قۇلشىنىستى بولۋعا ءتيىس. ءبىز جاستارىمىز باعىت الىپ، بوي تۇزەۋگە ءتيىس ءوز زامانىمىزدىڭ جاڭا قاھارماندارىن كورسەتۋ جانە جاساۋىمىز كەرەك»، - دەپ قازاقستان رەسپۋبليكاسىنىڭ پرەزيدەنتى ن.ءا.نازاربايەۆتىڭ «قازاقستان – 2050» ستراتەگياسى: قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا  جولداۋىندا اتاپ كورسەتكەندەي، قالامگەرلەر قاۋىمىنا مىندەتتەلەر جۇك، ارتىلار سەنىم از بولماق ەمەس.

سماعۇل مىرزانىڭ  مازمۇندى اڭگىمەسىنەن سوڭ كەزەك اۋديتوريانى قامتىدى. جيىن اڭگىمە-سۇحباتقا قۇرىلىپ، جازۋشىعا سۇراقتار قويىلدى. بولاشاق تىل-ادەبيەت ماماندارىن مازالاعان سۇراقتار جازۋشىنىڭ كينودراماتۋرگياداعى، قازىرگى شىعارماشىلىعىنداعى ىزدەنىستەرگە جانە بۇگىنگى ادەبي سىن توڭىرەگىنە، قوعامنىڭ دىلگىر ماسەلەلەرىنە بايلانىستى ءوربىدى. قالامگەرمەن  سۇحبات جۇرگىزۋ بارىسىندا جاس بۋىن وكىلدەرى وزدەرىنىڭ ءبىلىم دەڭگەيلەرىنىڭ  جان-جاقتى، ءارى تەرەڭ ەكەندىگىمەن ءسۇيسىنتتى. رۋحانياتتىڭ كوكەيتەستى ماسەلەلەرى اياسىندا وتكىزىلگەن جۇزدەسۋدىڭ  جاستارعا بەرەرى مول، تاعىلىمى زور بولدى.

كەزدەسۋ سوڭىندا ستۋدەنتتەر مەن ۇستازدارعا س.ەلۋباي قولتاڭبا بەرىپ، ەستەلىك سۋرەتكە ءتۇستى.

شوقان شورتانبايەۆ،

ءال-فارابي اتىنداعى ءقازۇۋ-دىڭ اعا وقىتۋشىسى