اتىراۋ وبلىستىق پەريناتالدىق ورتالىعىنداعى قىزمەتتەرىنەن باس تارتىپ، ارىز جازعان دارىگەرلەرمەن ق ر پارلەمەنت ءماجىلىسىنىڭ دەپۋتاتى زاۋرەش امانجولوۆا كەزدەسىپ، تالاپتارىن تىڭدادى. حالىق قالاۋلىسىنىڭ ايتۋىنشا اتىراۋلىق دارىگەرلەردە قورقىنىش بار دەپ جازادى Qamshy.kz اقپارات اگەنتتىگى.
"ءبىزدىڭ ءىس-ساپارىمىزدىڭ ماقساتى اتىراۋ پەريناتالدىق ورتالىعىنداعى دارىگەرلەرمەن جۇزدەسۋ،ولاردىڭ تالاپ-تىلەكتەرىن تىڭداۋ. ويتكەنى، بۇل جاعداي حالىقتىڭ ەم الۋىنا، مەديسينالىق كومەك الۋىنا كەدەرگى كەلتىرمەۋ كەرەك. ءقازىر مۇنداعى ۇجىم ءبىرقالىپتى جۇمىس اتقارىپ جاتىر. مينيسترلىكتەن ماماندار، سونداي اق، اقتوبە مەديسينالىق ۋنيۆەرسيتەتىنىڭ دارىگەرلەرى، الماتى مەن استاناداعى عىلىمي زەرتتەۋ ينستيتۋتتارىنىڭ پروفەسسورلارى كەلىپ قولداۋ كورسەتىپ جاتىر. سوندىقتان بارلىعىمىز جۇدىرىقتاي جۇمىلىپ، مۇنداعى انا مەن بالاعا كورسەتىلەتىن مەديسينالىق قىزمەتتىڭ دەڭگەيىن تومەندەتپەۋگە جۇمىستانۋىمىز قاجەت. سونىمەن قاتار ۇجىمعا مورالدىق-پسيحولوگيالىق كومەك بەرۋىمىز كەرەك. ءقازىر پەريناتالدىق ورتالىقتاعى دارىگەرلەردە ۇرەي مەن قورقىنىش بار. ولار "قانداي قاتەلىك جاساپ قويامىز، ول ءۇشىن ءبىزدى قالاي جازالايدى" دەپ قورقىپ قالعانى بايقالادى"،- دەيدى ق ر پارلامەنتىنىڭ ءماجىلىس دەپۋتاتى زاۋرەش امانجولوۆا.
ەسكە سالساق، اتىراۋلىق دارىگەرلەر جاڭا تۋعان شاقالاقتى ءولدى دەپ جازىپ قويعاندىقتان، ونىڭ ءتىرى ەكەندىگىنە قاراماستان، شاقالاقتى مۇزداتقىشقا سالىپ تاستاعانى تۋرالى جاعا ۇستارلىق جاڭالىق كۇللى جۇرتتى ءدۇر سىلكىندىرگەن بولاتىن. وسى وقيعاعا قاتىستى تەرگەۋ امالدارى جۇرگىزىلىپ جاتىر.
پىكىر قالدىرۋ