الماتى اكىمى باقىتجان ساعىنتايەۆ «قازاق سسر تىلدەر تۋرالى» العاشقى زاڭنىڭ قابىلدانعانىنا 30 جىل تولۋىنا وراي ءبىر توپ عالىمدارمەن، جازۋشىلارمەن، جۋرناليستەرمەن جانە قوعام قايراتكەرلەرىمەن كەزدەستى، دەپ جازادى قالالىق اكىمدىكتىڭ باسپا ءسوز قىزمەتى.

ب. ساعىنتايەۆ قۇرمەتتى ميسسيانى اتقاردى، ياعني مەملەكەتتىك ءتىلدىڭ دامۋىنا ۇلەس قوسقان جازۋشىلار مەن قوعامگەرلەرگە مەملەكەت باسشىسىنىڭ العىس حاتتارىن تاپسىردى.

ولاردىڭ اراسىندا «مەملەكەتتىك تىلگە قۇرمەت» قوعامدىق بىرلەستىگىنىڭ ءتورايىمى اسىلى وسمان، حالىقارالىق «قازاق ءتىلى» قوعامىنىڭ پرەزيدەنتى ءومىرزاق ايتبايەۆ، م. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ، جازۋشى سماعۇل ەلۋبايەۆ، ا. بايتۇرسىنوۆ اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى تەلحوجا دجانۋزاكوۆ، حالىق جازۋشىسى مۇحتار شاحانوۆ، ا. بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى ەردەن قاجىبەك، قازاقستان جازۋشىلار وداعى ءتوراعاسىنىڭ ورىنباسارى مەرەكە قۇلكەنوۆ، ۇلتتىق اۋدارما بيۋروسىنىڭ رەداكتورى نازگۇل قوجابەكوۆا، جازۋشى-پۋبليسيست جۇماش كەنەباي، «جاس قازاق» گازەتىنىڭ باس رەداكتورى سمايىل سرايىل بولدى.

كەزدەسۋ بارىسىندا مەملەكەتتىك ءتىلدى ودان ءارى دامىتۋ، ونى قالا جۇرتى اراسىندا دارىپتەۋ ماسەلەلەرى تالقىلاندى جانە ءوزارا پىكىر ءبولىستى. سونىمەن قاتار قالا مەكتەپتەرىنىڭ كىتاپحانالارىن، قازاق جازۋشىلارىنىڭ كىتاپتارى مەن تولتىرۋ جانە ينتەرنەت بازاسىن قازاق ءتىلدى كونتەنتپەن تولىقتىرۋ ۇسىنىلدى.