جامبىل وبلىسى گەوگرافيالىق تۇرعىدان وڭتايلى ورنالاسۋى ونى ەلىمىزدىڭ جانە شەت ەلدەردەن كەلگەن ينۆەستورلار ءۇشىن قارجى سالىپ، ءىس جۇرگىزۋگە اسا تارتىمدى ايماققا اينالدىرىپ وتىر. ال، قويناۋىنىڭ كەنگە تولى بولۋى مەن توپىراعىنىڭ شۇرايلىلىعى ونەركاسىپ پەن اۋىل شارۋاشىلىعىن دامىتۋ ارقىلى ەكونوميكاعا كولەمدى كىرىس تۇسىرۋگە مۇمكىندىك بەرەدى، دەپ جازادى Qamshy.kz اقپارات اگەنتتىگى. تەك، اتالعان شارۋالاردى جۇرگىزۋگە نيەتتى تۇلعالار مەن وعان قارجى سالۋعا دايىن ازاماتتار تابىلسا بولعانى. بۇل رەتتە، قارجى سالىپ، جۇمىس جاساۋعا نيەتتى ازاماتتاردى تارتا ءبىلۋ اسا ماڭىزدى.
راسىندا جامبىل وبلىسى ينۆەستيسيا سالۋ ءۇشىن اسا ءتيىمدى ءوڭىر. ويتكەنى، 144 مىڭ شارشى شاقىرىمدى الىپ جاتقان جامبىل جەرى اگرارلىق، ونەركاسىپ سالاسى قارقىندى دامىپ كەلە جاتقان، ەكونوميكالىق جانە ينتەللەكتۋالدىق پوتەنسيالى قالىپتاسقان ايماق. بۇل رەتتە، ينۆەستورلار ءۇشىن وڭىردەگى تاۋ-كەن، تابيعي گاز، حيميالىق، مۇناي وڭدەۋ، تاماق جانە مەتاللۋرگيالىق، قۇرىلىس ماتەريالدارى مەن ەلەكتر ەنەرگەتيكالىق ءوندىرىستىڭ جولعا قويىلعانى دا ءبىزدىڭ وبلىسقا كەلۋگە تۇرتكى بولارى انىق.
ءبىر عانا تاۋ-كەن ءوندىرىسى سالاسىنداعى فوسفوريت، ءباريتتى جانە مارگانەستى رۋدالاردى، گاز وڭدەۋ جالپى ونەركاسىپتىك ءوندىرىستىڭ 7 پايىزىن قۇرايدى. ال، حيميالىق ونەركاسىپ سالاسى ەلىمىز بويىنشا الدىڭعىلار قاتارىندا. ويتكەنى، اتالعان سالا وبلىستان ەكسپورتقا شىعارىلاتىن تاۋارلاردىڭ 70 پايىزىن الادى. ال، ەلىمىز بويىنشا وندىرىلەتىن حيميا ونىمدەرىنىڭ ۇشتەن ءبىر بولىگىن ەنشىلەيدى.ارينە، مۇنداي قازبالى بايلىقتاردىڭ مول مولشەرى كەن وندىرۋشىلەردى قىزىقتىرماي قويماسى انىق. بۇدان بولەك، وبلىسىمىز فوسفوريت پەن كەن وڭدەۋدە قولدانىلاتىن شپاتتىڭ مول قورىنا يە. سونداي-اق، اۋليەتا جەرىنىڭ قويناۋىنان مىس، التىن، كۇمىس، قورعاسىن، مىرىش سەكىلدى باعالى مەتالدار، باريت، كومىر، قۇرىلىستا پايدالانىلاتىن ءتۇرلى ساندىك تاستار مەن اسبەست، سەمەنت، كەرامزيت شيكىزاتى جانە گيپستىڭ قوماقتى مولشەرى بار.
ينۆەستيسيالار تارتۋ كەزىندە ءوزارا ءىس-قيمىل جاساۋ رەگلامەنتىنە سايكەس جۋىردا وبلىس اكىمدىگى كاسىپكەرلىك جانە يندۋستريالدى-يننوۆاسيالىق دامۋ باسقارماسىندا «دجون بان مەتاللپروم» اق – نىڭ ينۆەستورلارىمەن كەزدەسۋ ءوتتى.
كەزدەسۋدە «دجون بان مەتاللپروم» اق جالپى قۇنى 7،8 ملرد. تگ قۇرايتىن مىرىش وكسيدى مەن قورعاسىن وكسيدىن وندىرەتىن سەحتاردى قايتا قۇرۋ جانە قۇرىلىس ماتەريالدارىن ءوندىرۋ (كۇيدىرىلگەن كىرپىشتەر، تروتۋار پليتكالارى) ينۆەستيسيالىق جوباسى تانىستىرىلدى.
جوبانى 3 كەزەڭمەن ىسكە اسىرۋ جوسپارلانعان. جوبانى ىسكە اسىرۋمەن بارلىعى 80-نەن استام جاڭا جۇمىس ورىندارىن اشۋ جوسپارلانعان. جيىن بارىسىندا قۇرىلىس-مونتاجداۋ جۇمىستارىنىڭ وندىرىستىك كەستەسى تالقىلانىپ، جەرگىلىكتى تەحنيكالىق ماماندىق يەلەرى مەن جۇمىسشىلاردىڭ قاجەتتى رەسۋرسىن تارتۋ ماسەلەسى ايتىلدى.
كەزدەسۋ ناتيجەسىمەن جامبىل وبلىسى اكىمدىگى اتىنان وبلىس اكىمىنىڭ ورىنباسارى ن.كالەندەروۆ جانە «دجون بان مەتاللپروم» اق باسشىلىعى ينۆەستيسيالىق جوبانى سۇيەمەلدەۋ ماقساتىندا ءوزارا ارىپتەستىك مەموراندۋمعا قول قويدى.
