پارلامەنت ماجىلىسىندەگى ۇكىمەت ساعاتىندا ءبىلىم سالاسىن دەپۋتات بەكبولات تىلەۋحان سىنادى. ول ەگەر پروبلەمالار شەشىلەتىن بولسا، دەپۋتاتتىق مانداتىن تاستاپ، مينيسترگە كومەكشى بولۋعا دايىن ەكەنىن ايتتى.

«جۇيە قۇردىمعا كەتىپ بارا جاتىر. قاي جاعىنان كەلسەك تە سىن كوتەرمەيدى. ءمۇعالىم دايىنداۋ جۇيەسىن، وقۋلىق شىعارۋ جۇيەسىن، ورتا ءبىلىم جۇيەسىن قايتا قاراۋ كەرەك. مىنا تۇرىمىزبەن شەگىنە بەرسەك، ۇرپاق مياقى بولادى...اسحاتجان، سەنەن جاسىم از ەمەس، تاجىريبەم دە از ەمەس. اتاقتارىم دا كوپ اۋ دەيمىن، تاپ وسى ماسەلە شەشىلەتىن بولسا، دەپۋتاتتىق مانداتىمدى تاستاپ، سەنىڭ كابينەتىڭە بارىپ كومەكشى بولۋعا، حاتشى بولۋعا دايىنمىن»، - دەدى دەپۋتات.

ودان وزگە مەكتەپ باعدارلاماسىنىڭ قيىندىعى مەن وقۋلىق ساپاسىنىڭ تومەندىگى كەلەشەك بۋىن ءۇشىن ازاپ دەيدى.

«مەنىڭ وقۋلىقتاردى شىعارۋ جۇيەسىن شىرىك جۇيە دەپ باتىل ايتۋىما نەگىز بار. بۇل – بەتوننىڭ ۇستىنە تاستاعان ءداندى مىڭ جەردەن سۋارساڭىز دا وسپەيتىنى سەكىلدى. ءبىز ۇرپاقتى ازاپتاپ جاتىرمىز. ءبىر ەسەپتى بالا تۇگىلى اتا-اناسى شىعارا المايتىن بۇل بارىپ تۇرعان قاسكويلىك جۇيە»، – دەپ ءوز ويىن ءبىلدىرىپ، 2007 جىلدان بەرى ميللياردتاعان اقشاعا الىنعان پاندىك لابوراتوريالاردىڭ جۇمىس ىستەمەي، پايداسىز بولىپ تۇرعانىن دا سىنادى.