اتىراۋداعى ءسابي ولىمىنەن كەيىن رەسپۋبليكا بويىنشا دەرەكتەر مەن مەديسينالىق كارتالارعا جاپپاي اۋديت جۇرگىزگەن. بۇل تۋرالى ق ر دەنساۋلىق ساقتاۋ ءمينيسترى ە.ءبىرتانوۆ ايتتى.

«دەنساۋلىق ساقتاۋ – ەلىمىزدىڭ نەگىزگى باسىمدىقتارىنىڭ ءبىرى. قارقىندى جۇمىس پەن كەشەندى تاسىلدەردىڭ ارقاسىندا جالپى سوڭعى بەس جىلدا انا، تۋبەركۋلەزدەن بولاتىن ءولىمنىڭ، قان اينالىم جۇيەسى اۋرۋىنان بولاتىن، ونكولوگيا جانە جاراقاتتان بولاتىن ءولىمنىڭ تومەندەگەنى بايقالادى. الايدا ۇزاق مەرزىمدى كەزەڭدە وسى جىلدىڭ 8 ايىنىڭ دەرەكتەرى بويىنشا جالپى ءولىمنىڭ جانە نارەستە ءولىمىنىڭ وسۋىندە بولماشى اۋىتقۋلار بايقالادى»، – دەدى مينيستر پارلامەنت سەناتىندا.

ەلجان ءبىرتانوۆتىڭ ايتۋىنشا، ءولىم سەبەپتەرى بويىنشا جۇيەلى شارالار سيفرلاندىرۋ مەن ستاتيستيكالىق دەرەكتەردىڭ ساپاسىن جاقسارتۋ ارقىلى بەلسەندى تۇردە جۇرگىزىلگەن.

«ءبىز اتىراۋ وبلىسىندا بارلىق تۋعاننان كەيىن شەتىنەپ كەتكەن نارەستەلەردىڭ شىنى پرەپاراتتارىنان الىنعان وبەكتيۆتى دەرەكتەر مەن مەديسينالىق كارتالاردىڭ اۋديتىنەن كەيىن ەل بويىنشا جاپپاي اۋديت جۇرگىزدىك. تالداۋ ناتيجەسىندە ەسەپكە الىنباعان ەرتە نەوناتالدىق ءولىم-جىتىمنىڭ (...) 277 نارەستە ءولىمىن جاسىرىپ قالۋ فاكتىلەرىن انىقتادىق. وسىعان بايلانىستى 2018 جىلى نارەستە ءولىمىنىڭ كورسەتكىشىنە تۇزەتۋ جۇرگىزىلدى. بۇرىنعى 1000 ءتىرى تۋعان نارەستە بويىنشا ءولىم-جىتىم كورسەتكىشى 8،03-تەن 8،7-گە وزگەرگەن»، – دەدى ول.