ماجىلىستەگى جالپى وتىرىستا بىرنەشە زاڭ جوباسى قارالدى. اتالمىش زاڭ جوباسىنىڭ ىشىندە "2020-2022 جىلدارعا ارنالعان رەسپۋبليكالىق بيۋدجەت تۋرالى" دا بار، – دەپ Qamshy.kz اقپارات اگەنتتىگى حابارلايدى.

ءبىلىم جانە عىلىم ءمينيسترى اسحات ايماعامبەتوۆتىڭ مالىمدەۋىنشە، ءۇش جىلدىق بيۋدجەتتە ءبىلىم سالاسىنا قىرۋار قارجىنى ءبولۋ قاراستىرىلعان. ەڭ باستىسى، بۇل ماسەلەدە ۇستازداردىڭ جالاقىسىن كوتەرۋ ەسكەرىلگەن.

"كەلەسى جىلى 25 پروسەنتكە، ودان كەيىن 50 پروسەنتكە، ارى قاراي 70 پروسەنتكە، ەڭ سوڭىندا 100 پروسەنتكە كوتەرۋ تاپسىرماسى بار. وسى تاپسىرما بويىنشا ءتيىستى قارجى قاراستىرىلدى. ول – ءبىر. ەكىنشىدەن، اپاتتى جاعدايدا جانە ءۇش اۋىسىمدا جۇمىس ىستەيتىن مەكتەپتەردى جويۋ بويىنشا قاراجات ءبولىنىپ جاتىر. بۇدان بولەك، كوللەدجدەردى جابدىقتاۋ، جاس مامانداردى قولداۋ جانە باسقا دا باعدارلامالار بويىنشا ءىرى كولەمدە قارجى بەرىلىپ وتىر"، – دەپ جۋرناليستەرگە ايماعامبەتوۆ سۇحبات بەردى.

ءمينيستردىڭ سوزىنە قاراساق، ءۇش جىلدىق بيۋدجەتتە ۇستازداردىڭ جالاقىسىن كوتەرۋ شارالارىنا 1،7 تريلليون تەڭگە قاراستىرىلعان. ەلىمىزدە  بۇگىنگە دەيىن ءبىلىم سالاسىنداعى ۇستازدارعا مۇنداي قارجى بولمەگەن ەدى.

"ەندىگى ماقساتىمىز – ول اقشانى ءاربىر پەداگوگقا جەتكىزۋ جانە ءبىلىم بەرۋ ساپاسىن كوتەرۋ. 500 مىڭنان استام پەداگوگقا سان الۋان قوسىمشا اقىلار بەرىلەدى. سوسىن عىلىم سالاسىن قارجىلاندىرۋ كولەمى ەكى ەسەگە ارتىپ وتىر"، – دەپ اتاپ كورسەتتى ا.ايماعامبەتوۆ.

بۇدان بولەك، ءۇش جىلدىق بيۋدجەتتە مادەنيەت پەن ونەر قىزمەتكەرلەرىنىڭ جالاقىسىن كوتەرۋ، تۇرعىن ءۇي قورىن جاڭعىرتۋ، مىندەتتى الەۋمەتتىك مەديسينالىق ساقتاندىرۋ، ءبىلىم سالاسىن جان باسىنا قاراي قارجىلاندىرۋ، اۋىلدى ساپالى اۋىز سۋمەن قامتۋ، گازداندىرۋ، جەرگىلىكتى جولداردى دامىتۋ، جۇمىسپەن قامتۋ مەن كاسىپكەرلىكتى دامىتۋ، اگروونەركاسىپ كەشەنىن نىعايتۋ، جاستار مەن كوپبالالى وتباسىلاردى باسپانامەن قامتۋ جانە تاعى باسقا ماڭىزدى شارالار قاراستىرىلعان.