جاقىندا №3 كوزى ناشار كورەتىن بالالارعا ارنالعان مامانداندىرىلعان مەكتەپ-ينتەرنات 40 جىلدىق مەرەيتويىن اتاپ وتەدى. شارا اياسىندا قالامىزدا ءبىرقاتار ءىس-شارالار بولدى. ەڭ الدىمەن مەرەيتوي يەلەرى قوناقتاردى قابىلداپ، وقۋ ورىننىڭ ماتەريالدىق-تەحنيكالىق جابدىقتالۋىن، سونداي-اق ەرەكشە قاجەتتىلىكتەرى بار بالالارمەن جۇمىس ىستەۋ مۇمكىندىگىن كورسەتتى.

اباي اتىنداعى تەاتردا وتكەن رەسپۋبليكالىق سەمينارعا ينتەرنات تۇلەكتەرى، وقۋشىلارى، كورنەكتى قوعام قايراتكەرلەرى مەن ۇستازدار  قاتىستى. مەكتەپ مۇعالىمدەرى مەن تاربيەشىلەرى كوپ جىلعى ءمىنسىز ەڭبەگى جانە ۇلگىلى جۇمىسى ءۇشىن وبلىس جانە قالا باسشىلىعىنىڭ اتىنان گراموتالار مەن العىس حاتتارمەن  ماراپاتتالدى. شىعىس قازاقستان وبلىسى ءبىلىم باسقارماسى باسشىسىنىڭ ورىنباسارى ايگۇل بايجانوۆا قۇتتىقتاۋ ءسوز سويلەدى.

– قۇرمەتتى ارىپتەستەر، ۇستازدار، اتا-انالار مەن وقۋشىلار. مەن بارلىقتارىڭىزدى مەرەيتويمەن شىن جۇرەكتەن قۇتتىقتايمىن. وسى جىلدار ىشىندە مەكتەپ ءوزىن تەك ءبىلىم بەرۋ مەكەمەسى رەتىندە عانا ەمەس، سونىمەن قاتار تالانتتاردىڭ التىن ۇياسى رەتىندە كورسەتە ءبىلدى. باسشىلىققا جانە بارشا ۇجىمعا تاباندى قىزمەتتەرىڭىز ءۇشىن زور العىسىمدى بىلدىرەمىن. سىزدەرگە الداعى ۋاقىتتا دا تەك  تابىس تىلەيمىن، – دەدى ايگۇل بايجانوۆا.

ءبىلىم باسقارماسى باسشىسىنىڭ ورىنباسارى وبلىس باسشىلىعى اتىنان مەكتەپكە شاعىن اۆتوبۋستىڭ كىلتىن تابىس ەتتى. العىس رەتىندە مەكتەپ-ينتەرنات وقۋشىلارى قوناقتارعا كونسەرتتىك باعدارلامارىن ۇسىندى.

سەمەي قالاسىنىڭ اقپاراتتىق ورتالىعى