اتىراۋ وبلىسىندا توعىز ايدىڭ ىشىندە ءبىر جاسقا دەيىنگى 156 ءسابي شەتىنەگەن. بۇل تۋرالى بۇگىن دەنساۋلىق ساقتاۋ مينيسترلىگى تاۋارلار مەن قىزمەتتەر ساپاسى مەن قاۋىپسىزدىگىن باقىلاۋ كوميتەتىنىڭ ءتوراعاسى ليۋدميلا بيۋرابەكوۆا مالىمدەدى،– دەپ Qamshy.kz اقپارات اگەنتتىگى حابارلايدى.

"اتىراۋ وبلىسى بيىل نارەستە ءولىم-جىتىمىنىڭ كورسەتكىشى بويىنشا الدىڭعى ورىندا تۇر. 9 ايدىڭ ىشىندە وبلىستا ءبىر جاسقا دەيىنگى 156 ءسابي شەتىنەگەن، ونىڭ ىشىندە 98 بالا وبلىستىق پەريناتالدىق ورتالىعىندا كوز جۇمدى. قالعان 54ء-ى باسقا مەديسينالىق ۇيىمداردا، ال تورتەۋى ۇيدە شەتىنەگەن"، –دەدى بيۋرابەكوۆا ورتالىق كوممۋنيكاسيالار قىزمەتىندە اتىراۋ وبلىسىندا نارەستە ولىمىنە قاتىستى جۇرگىزىلگەن تەكسەرىستىڭ قورىتىندىسى تۋرالى بريفينگتە.

مالىمدەمەدە ءسابي ءولىمىنىڭ نەگىزگى سەبەپتەرى – پەريناتالدىق كەزەڭدەگى جاعداي، ينفەكسيالىق اۋرۋلار، تۋا بىتكەن كەمىستىكتەر جانە جازاتايىم وقيعالار.

سونداي-اق بريفينگ بارىسىندا ل.بيۋرابەكوۆا اتىراۋ وبلىسىندا نارەستەلەر ءولىمى تامىز بەن قىركۇيەك ايلارىندا وسكەندىگىن ايتتى.

"وسىعان بايلانىستى تامىزدا شەتىنەگەن 26، ال قىركۇيەكتە كوز جۇمعان 16 ءسابيدىڭ مەديسينالىق كارتاسىنا ەگجەي-تەگجەيلى تالداۋ جۇرگىزىلدى. شەتىنەگەن سابيلەردىڭ اراسىندا 73،4 پروسەنتى – شالا تۋعاندار. مەديسينالىق كارتالار مەن گيستولوگيالىق ماتەريالداردىڭ تالداۋىنان كورگەنىمىزدەي، تامىزدا اتىراۋ وبلىستىق پەريناتالدىق ورتالىعىن ينفەكسيا جايلاعان. سانيتارلىق-ەپيدەميولوگيالىق رەجيم ساقتالماعاندىقتان، قىركۇيەك ايىندا تۋعان سابيلەر دە اۋرۋحانادان ينفەكسيا جۇقتىرعان. ەپيدەميولوگيالىق تەرگەۋ ناتيجەسى وسى فاكتىنى راستاپ وتىر"، – دەدى ءتوراعا.