«Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەكتىڭ قاتىسۋىمەن «Nur Otan» پارتياسى جانىنداعى «ميراس» رەسپۋبليكالىق قوعامدىق كەڭەسىنىڭ «قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011–2019 جىلدارعا ارنالعان مەملەكەتتىك باعدارلاماسىنىڭ» ورىندالۋىن تالقىلاۋعا ارنالعان وتىرىسى ءوتتى. جيىنعا بيلەۋشى پارتيا باسشىلىعى، جاۋاپتى مەملەكەتتىك ورگاندار جانە شىعارماشىلىق پەن عىلىم وكىلدەرىنەن قۇرالعان زيالى قاۋىم قاتىستى.
كەڭەستە «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك مەملەكەتتىك ءتىلدى، مادەنيەت پەن ءداستۇردى دامىتۋ «Nur Otan» پارتياسىنىڭ ستراتەگيالىق باسىمدىقتارىنىڭ ءبىرى ەكەنىن اتاپ ءوتتى.
«ەلباسى ساياساتىنىڭ ارقاسىندا انا ءتىلىمىزدى ساقتاپ قانا قويماي، ونى قازاقستاندا عىلىم مەن ءبىلىم سالاسىنىڭ نەگىزگى تىلىنە اينالدىرۋ ءۇشىن بارلىق جاعداي جاسالدى. ەلىمىزدىڭ باستى زاڭى – كونستيتۋسيادا ناقتى مەملەكەتتىك ءتىل – قازاق ءتىلى دەپ بەكىتىلدى. تىلدەر تۋرالى زاڭ قابىلدانىپ، مەملەكەتتىك ءتىلدىڭ قولدانىلۋ تالاپتارى باسقا دا سالالىق زاڭداردا ايشىقتالدى. بۇگىندە مەكتەپتەردىڭ 70% قازاق تىلىندە ءبىلىم بەرەدى. مەملەكەتتىك تىلدە وقيتىن ستۋدەنتتەردىڭ ۇلەسى – 64،5% قۇرايدى. ەلباسى باستاماسىمەن، الەمدەگى ۇزدىك وقۋلىقتار مەن كىتاپتاردى شەتەل تىلدەرىنەن تىكەلەي قازاق تىلىنە اۋدارۋ جۇمىستارى ىسكە اسىرىلۋدا، قازاق ءالىپبيىن لاتىن گرافيكاسىنا كوشىرۋ قولعا الىندى. قازاق ءتىلىنىڭ قولدانۋ اياسى بۇرىنعىمەن سالىستىرعاندا ايتارلىقتاي كەڭەيدى»، - دەدى باۋىرجان بايبەك.
سونىمەن قاتار، ول تاۋەلسىزدىكتىڭ العاشقى جىلدارىندا حالىق ساناعى بويىنشا ۇلتىمىزدىڭ ۇلەس سالماعى 39%-دى قۇراعانىن، ال مەكتەپتەردىڭ بار-جوعى 30%-ى قازاق تىلىندە ءبىلىم بەرگەنىن تىلگە تيەك ەتتى. بۇگىندە دەموگرافيالىق پروبلەما شەشىمىن تاۋىپ، ەل حالقىنىڭ سانى 18 ميلليوننان اسسا، ونىڭ 70%-عا جۋىعىن قازاق ۇلتى قۇراپ وتىر. وسى جىلدار ىشىندە كەزىندە شەتەلگە كەتۋگە ءماجبۇر بولعان 1 ميلليوننان استام قازاق ەلگە ورالعان.
ءماجىلىس بارىسىندا «ميراس» رەسپۋبليكالىق قوعامدىق كەڭەسىنىڭ مۇشەلەرى مەملەكەتتىك تىلگە قاتىستى ءوز پىكىرلەرى مەن ۇسىنىستارىن ورتاعا سالدى. بەلگىلى بلوگەر ياكوۆ فەدوروۆ مەملەكەتتىك قىزمەتكە قابىلداناتىن ءاربىر ازاماتتىڭ مەملەكەتتىلىك ءتىلدى ءبىلۋى ءتيىس ەكەندىگىن، سوندىقتان وسى تالاپتى ەسكەرەتىن تەتىكتەردى ازىرلەۋ قاجەتتىگىن العا تارتسا، ق ر سەناتىنىڭ دەپۋتاتى نۇرتورە ءجۇسىپ باق-تاعى قازاق تىلىندەگى كونتەنتتىڭ ۇلەسىنە توقتالىپ، ولاردىڭ سانى مەن ساپاسىن ارتتىرۋدى ۇسىندى.
استانا قالاسىنداعى تۇرىك ەتنومادەني ورتالىعىنىڭ ءتوراعاسى اسكەر پيرييەۆ ينتەرنەتتە قازاق ءتىلدى اقپاراتتىق ءونىمنىڭ ءالى دە جەتكىلىكتى ەمەس ەكەندىگىن ايتىپ، ونى ارتتىرۋ ءۇشىن مەملەكەت ەسەبىنەن شىعارىلعان كەز كەلگەن مەدياونىم ينتەرنەت جەلىگە تەگىن جاريالانسا دەگەن ويىمەن ءبولىستى. وسى ويدى قۋاتتاعان قوعام قايراتكەرى، ءتىل جاناشىرى ورازكۇل اسانعازى قازاق تىلىندەگى ءىس قاعازدارىنىڭ، كورنەكى اقپاراتتاردىڭ ساپاسىنا تەكسەرۋ جۇرگىزۋ، بۇعان بارشا ىنتالى جاندار مەن جاستاردى، ەرىكتىلەردى جۇمىلدىرۋ، جۇرتشىلىققا ارنالعان ساپالى، ونەگەلى كونتەنتتى كوبەيتۋ، اسىرەسە بالالارعا ارنالعان مۋلتفيلمدەر شىعارۋعا قاراجات قاراستىرۋ قاجەتتىگىن باسا ايتتى.
«ەگەمەن قازاقستان گازەتى» اق باسقارما ءتوراعاسى دارحان ءقىدىرالى قازاق ءتىلىنىڭ شىن مانىندە، اسىرەسە، تۇركى حالىقتارىنىڭ اراسىندا ۇلتارالىق تىلگە اينالۋعا مۇمكىنشىلىگى بار ەكەندىگىنە توقتالدى. مۇنى ىسكە اسىرۋدىڭ ءبىر تەتىگى رەتىندە ەلىمىزدە قازاق تىلىندە سويلەي الاتىن وزگە ۇلتتاردىڭ اراسىندا تىلدىك وليميپيادا وتكىزۋدى جانە ونىڭ جەڭىمپازدارىن ۋنيۆەرسيتەتتەرگە قابىلداۋعا جەڭىلدىكتەر قاراستىرۋدى ۇسىندى.
كەڭەس مۇشەلەرىنىڭ ۇسىنىستارى تىڭدالعان سوڭ، ق ر مادەنيەت جانە سپورت ءمينيسترى اقتوتى رايىمقۇلوۆا «قازاقستان رەسپۋبليكاسىنداعى تىلدەردى قولدانۋ مەن دامىتۋدىڭ 2011-2019 جىلدارعا ارنالعان مەملەكەتتىك باعدارلاماسىنىڭ ورىندالۋ بارىسى بويىنشا ەسەپ بەرىپ، كەڭەس مۇشەلەرىنىڭ سۇراقتارىنا جاۋاپ بەردى. ول وتىرىس بارىسىندا ايتىلعان بارلىق ۇسىنىس-پىكىرلەردىڭ مينيسترلىك تاراپىنان نازارعا الىنىپ، وسى ماسەلەلەر بويىنشا ارنايى جۇمىس توبى قۇرىلاتىنىن، تىلدەردى دامىتۋعا ارنالعان جاڭا باعدارلامانى ىسكە اسىرۋدا ەسكەرىلەتىنىن مالىمدەدى. بۇلاردىڭ بارلىعى دا اياقسىز قالماي، «ميراس» قوعامدىق كەڭەسىندە قارالىپ، «Nur Otan» پارتياسىمەن بىرلەسە اتقارىلۋ ارقىلى ناتيجە شىعارىلاتىنىن تاعى دا نىقتاپ ايتتى.
«ەل پرەزيدەنتى قاسىم-جومارت توقايەۆ حالىققا جولداۋىندا ايتقانداي، قازاق ءتىلى مەملەكەتتىك ءتىل رەتىندە ۇلتارالىق قاتىناس تىلىنە اينالۋى ءتيىس. بۇل ءۇشىن ونى قولدانۋعا دەگەن سۇرانىس قالىپتاستىرۋ كەرەك. وسى باعىتتاعى جۇمىستار ناتيجەلى بولۋ ءۇشىن جۇيەلى تالداۋعا جۇگىنۋ، حالىقارالىق تاجىريبەنى زەردەلەۋ، رەسمي ورىندار باسشىلارىنىڭ جاۋاپكەرشىلىگىن ارتتىرۋ قاجەت»، - دەپ تۇيىندەدى باۋىرجان بايبەك.
