ەلوردا دا قازاقستان پرەزيدەنتى قاسىم-جومارت توقايەۆ پەن بەلارۋس باسشىسى الەكساندر لۋكاشەنكونىڭ شاعىن قۇرامداعى كەزدەسۋى اياقتالدى، دەپ Qamshy.kz اقپارات اگەنتتىگى حابارلايدى.

"جاڭا عانا جابىق شاعىن فورماتتا نەگىزگى پروبلەمالىق ماسەلەلەر جايلى سويلەستىك. ويتكەنى ەڭ جاقىن ەلدەردىڭ ءوزارا قارىم-قاتىناسىندا قايتكەن كۇندە دە تالقىلاۋدى، ناقتىلاۋدى، ەڭ باستىسى، شەشىم قابىلداۋدى قاجەت ەتەتىن ماسەلەلەر تۋىندايدى"، - دەدى مەملەكەت باسشىسى.

پرەزيدەنتتىڭ ايتۋىنشا، كەلىسسوزدەر ناتيجەسىندە ەكى ەل وتە ماڭىزدى ۋاعدالاستىققا قول جەتكىزگەن. جانە ول جۋىق ارادا جۇزەگە اسادى.

"ءبىز ەكى مەملەكەت اراسىندا ساۋدا كولەمىن ۇلعايتۋعا، گۋمانيتارلىق سالادا ءوزارا بايلانىستى نىعايتۋعا، حالىقارالىق ۇيىمداردا بەلسەندى ءوزارا ءىس-قيمىلدى جالعاستىرۋعا مۇددەلىمىز"، –دەي كەلە، كەزدەسۋ قورىتىندىسى بويىنشا كەلىسىمگە قول قويىلىپ، ەكى پرەزيدەنت بىرلەسكەن مالىمدەمە جاسايدى" – دەدى توقايەۆ.

بەلارۋس پرەزيدەنتى لۋكاشەنكو دوستاس قازاقستانعا كەلۋ مۇمكىندىگى ءۇشىن توقايەۆقا ريزاشىلىعىن ءبىلدىرىپ، "بۇگىندە بەلارۋس پەن قازاقستاننىڭ قارىم-قاتىناسى ەلدەرىمىزدىڭ ستراتەگيالىق مۇددەلەرىنە تولىعىمەن ساي كەلەدى. بۇل كەلەشەكككە ماڭىزدى جوسپار قۇرۋعا مۇمكىندىك بەرەتىن ۇزاق جىلعى جۇمىستىڭ جەمىسى"، - دەپ ويىن ايتتى.

سونداي-اق "ءبىز بۇگىن شاعىن قۇرامدا ەكونوميكا سالاسىنا باسىمدىق بەردىك. سەبەبى، ەكى ەل اراسىندا ساياسات، اسكەري-تەحنيكالىق ىنتىماقتاستىق، ديپلوماتيا سالالارىندا ءتۇيىنى تارقاماعان تۇيىتكىلدەر جوق دەۋگە بولادى"، – بەلارۋس باسشىسى.