الەۋمەتتىك جەلىلەردە "قازاقستاننىڭ جاڭا اسكەري تۋى" بەكىتىلدى دەپ تارالىپ، ءتۇرلى پىكىر تۋدىرعان اقپاراتقا قاتىستى ءماجىلىس دەپۋتاتى باقىتبەك سماعۇل پىكىر ءبىلدىردى دەپ حابارلايدى Qamshy.kz اقپارات اگەنتتىگى. بۇل تۋرالى دەپۋتات ءوزىنىڭ فەيسبۋكتەگى پاراقشاسىندا جازدى.

"بۇل تۋ – فەيك!

الەۋمەتتىك جەلىلەردە جانە ۋاتساپپ مەسسەندجەرىندە قازاقستاندىقتار «قازاقستاننىڭ جاڭا اسكەري تۋى» بەكىتىلگەنى تۋرالى حاباردى تالقىلاۋدا.
وسىعان بايلانىستى مەنىڭ ۇيالى تەلەفونىما اشىنعان ازاماتتاردان حابارلامالار تۇسە باستادى.

«پراۆوسلاۆ كرەسىنە كەلتىرىلگەن سياقتى. بۇل تۋدىڭ اۆتورلارى ورىس سياقتى، نە شوقىنعان قازاقتار»، «قازاقى ويۋىنىڭ ءوزى دە كرەست، بۇل نە ماسقارا!»، «توركىنى حريستياندىقتان باستاۋ الاتىن نورۆەگيانىڭ، شۆەيسيانىڭ، يسلانديانىڭ جالاۋىنان ۇرلانعان» دەپ شۋلاپ جاتىر ەل.

«باقىتبەك! جالاڭتوسكە ەسكەرتكىش ورىناتقانى ورىندى. ءبىراق بيلىكتىڭ مىنا اقپاراتتا ايتىلعان ءىسى راس بولسا، ءىس ناسىرعا شابادى. نەگە اقپارات الاڭىندا ءتۇسىندىرۋ كۇرەسىن جۇرگىزبەيسىڭدەر! ەل دۇرلىگۋدە، ال، «سكوروست پانيكي ۆو منوگو كرات ۆىشە گەومەتريچەسكوي پروگرەسسيي...» بيلىك تاراپىنان اقيقاتتى تۇسىندىرەتىن جەدەل قيمىل-ارەكەت كەرەك!» دەپ جازدى جاڭا عانا ۇلتجاندى ازاماتتاردىڭ ءبىرى.

سوندىقتان بۇل جاڭالىقتىڭ جالعان ەكەنىن جاريا ەتكىم كەلەدى.

ويتكەنى بىرىنشىدەن، «پرەزيدەنت قۇرلىق اسكەرلەرى، اۋە كۇشتەرى جانە اسكەري تەڭىز فلوتى ءۇشىن ءبىرىڭعاي اسكەري تۋدىڭ ديزاينىن بەكىتتى جانە ول ەلدىڭ بارلىق اسكەري بولىمدەرى مەن وقۋ ورىندارىندا پايدا بولدى»، – دەگەن اقپاراتتىڭ باستاپقى قاينار-كوزى «پانوراما» باسىلىمى بولىپ تابىلادى. ال ول ءوزىن «ساتيرالىق باسىلىم» دەپ اتايدى، ياعني جازاتىندارى اقيقات اۋىلىنان الىس قونعان ءازىل-قالجىڭدار عانا.

ەكىنشىدەن، اسكەري بولىمدەر مەن اسكەري وقۋ ورىندارىن جاڭا بايراق پايدا بولعان جوق، بارىندە قولدانىستاعى تۋلارى تۇر.

ۇشىنشىدەن، قورعانىس مينيسترلىگى باسشىلىعىمەن دە حابارلاستىم، ولار وسى كۇندەرى ەش اسكەري تۋ وزگەرتىلمەگەنىن راستادى.

اڭعال بولمايىق، اعايىن! كورىنگەن قۇيتىرقى ءازىل مەن فەيككە سۇيەنىپ، قازىرگى اۋمالى-توكپەلى زاماندا التىننان دا قىمبات تىنىشتىعىمىزدى توقىراتا بەرمەگەنىمىز ءجون" دەلىنگەن جازبادا.