2017 جىلدىڭ 1 شىلدەسىنەن 2019 جىلدىڭ 25 قازانى ارالىعىندا الەۋمەتتىك مەديسينالىق ساقتاندىرۋ قورىنا 222،3 ملرد تەڭگە جارنا ءتۇستى. ونىڭ 213،4 ملرد تەڭگەسى جۇمىس بەرۋشىلەردىڭ اۋدارىمدارى بولسا، قالعان 8،9 ملرد تەڭگەسى – جەكە كاسىپكەرلەر مەن ازاماتتىق-قۇقىقتىق كەلىسىمشارت نەگىزىندە ەڭبەك ەتەتىن تۇلعالارعا تيەسىلى. بۇل تۋرالى الماتى اكىمدىگىندە وتكەن بريفينگتە «الەۋمەتتىك مەديسينالىق اقتاندىرۋ قورى» كەاق الماتى فيليالى ديرەكتورى تىلەۋحان ابىلدايەۆ حابارلادى.

الماتى قالاسى جارنالار مەن اۋدارىمداردىڭ كولەمى جاعىنان رەسپۋبليكا بويىنشا كوش باستاپ تۇر. جينالعان سومانىڭ بەستەن ءبىر بولىگى وڭتۇستىك استانالىقتارعا تيەسىلى. جالپى 2017 جىلدىڭ شىلدەسىنەن 2019 جىلدىڭ 25 قازانىنا دەيىنگى ارالىقتا الماتى قالاسىنان قورعا 45،9 ملرد تەڭگە جارنا اۋدارىلدى. ونىڭ 43،4 ملرد تەڭگەسى – جۇمىس بەرۋشىلەردىڭ قاراماعىنداعى جۇمىسكەرلەرىنىڭ اتىنا جاساعان اۋدارىلىمدار.

ساقتاندىرۋ تولەمدەرى تۇراقتى اۋدارىلماعاندىقتان حالىقتىڭ 7%-عا جۋىعى «ساقتاندىرىلماعان» بولىپ سانالادى. ءقازىر ەلىمىزدە ءوزىن-وزى جۇمىسپەن قامتىعان 1،1 ملن ادام بار. ولاردىڭ دا ساقتاندىرۋ جۇيەسىنە قاتىسۋعا مۇمكىندىگى بار. ناقتىراق ايتقاندا، رەسمي جۇمىس ىستەمەيتىن، جەكە كاسىپكەر رەتىندە تىركەلمەگەن، ازاماتتىق-قۇقىقتىق كەلىسىمشارت نەگىزىندە قىزمەت كورسەتپەيتىن تۇلعالار ءوز بەتىنشە جارنا تولەي الادى. جارنا مولشەرى ەڭ تومەنگى جالاقىنىڭ 5%-ىن قۇرايدى. نەمەسە ءبىرىڭعاي جيىنتىق تولەم تولەۋگە بولادى.

ءبىرىڭعاي جيىنتىق تولەم ەلىمىزدە 2019 جىلدىڭ 1 قاڭتارىنان باستاپ ەنگىزىلگەن بولاتىن. جيىنتىق تولەمنىڭ ىشىندە وزگە دە الەۋمەتتىك تولەمدەرگە قوسا ساقتاندىرۋ جارناسى دا بار. ول جالپى سومانىڭ 40 پايىزىن قۇرايدى. بجت – رەسپۋبليكالىق ماڭىزى بار قالالار ءۇشىن 1 ايلىق ەسەپتىك كورسەتكىش (اەك) نەمەسە 2525 تەڭگە، اۋىلدىق جەرلەر ءۇشىن – 0،5 اەك نەمەسە 1263 تەڭگە كولەمىندە بەلگىلەنگەن. تولەمنىڭ بۇل ءتۇرىن فريلانسەرلەر، سانتەحنيكتەر، قۇرىلىسشىلار، تاكسي جۇرگىزۋشىلەرى ت.ب. تولەي الادى.

– قازىرگى تاڭدا قالادا ستاتۋسى انىقتالماعان 55 مىڭنان استام ازامات تۇرادى. بۇگىنگى كۇنگە دەيىن بارلىعى 5،9 مىڭ ادام ءبىرىڭعاي جيىنتىق تولەم تولەگەن، – دەدى الماتى قالاسى الەۋمەتتىك ءال-اۋقات باسقارماسى جەتەكشىسىنىڭ ورىنباسارى دانيار الكەباي ۇلى.

ەستەرىڭىزگە سالا كەتسەك، ءبىرىڭعاي جيىنتىق تولەمدى Egov پورتالى ارقىلى ونلاين رەجيمدە، سونداي-اق كەز كەلگەن ەكىنشى دەڭگەيلى بانك پەن «قازپوشتا» بولىمشەلەرى ارقىلى تولەۋگە بولادى.